കോഴിക്കോട്-കൊടുവള്ളിയില് അമ്മയേയും മകനേയും തൂങ്ങിമരിച്ച നിലയില് കണ്ടെത്തി. കൊടുവള്ളി ഞെള്ളോരമ്മല് ഗംഗാധരന്റെ ഭാര്യ ദേവി, മകന് അജിത് കുമാര് എന്നിവരെയാണ് വീടിനു സമീപത്തെ ടവറിനു മുകളില് തൂങ്ങിയ നിലയില് കണ്ടെത്തിയത്.
ഇന്നലെ രാവിലെ ദേവി ചികിത്സയ്ക്കായി കോഴിക്കോട്ട ഒരു വൈദ്യരുടെ അടുത്തുപോയിരുന്നു. കാല് മുറിച്ചുമാറ്റണമെന്ന് വൈദ്യര് പറഞ്ഞതായും ഇതിനാല് ഇനി ജീവിച്ചിരിക്കുന്നില്ലെന്നും ആത്മഹത്യ ചെയ്യുകയാണെന്നും ഇവര് വീട്ടിലേക്കു വിളിച്ചറിയിച്ചതായി പറയുന്നു. രാത്രി വൈകിയിട്ടും വീട്ടിലെത്താത്തതിനെ തുടര്ന്ന് എട്ടു മണിയോടെ ബന്ധുക്കള് കൊടുവള്ളി പോലീസില് പരാതി നല്കി.
നാട്ടുകാര് നടത്തിയ തെരച്ചിലില് പുലര്ച്ചെ മൂന്നരയോടെയാണ് ഇരുവരെയും ടവറിനു മുകളില് തൂങ്ങിയ നിലയില് കണ്ടെത്തിയത്. ഉടന്തന്നെ കോഴിക്കോട് മെഡിക്കല് കോളജ് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. അജിത് കുമാര് അവിവാഹിതനാണ്.
