കോഴിക്കോട് - പിക്കപ്പ് വാഹനത്തില് അതിവിദഗ്ധമായി ഒളിപ്പിച്ച് കടത്തുകയായിരുന്ന 13.500 കിലോഗ്രാമോളം കഞ്ചാവുമായി രണ്ട് പേരെ കസബ ഇന്സ്പെക്ടര് പ്രജീഷിന്റെ നേതൃത്വത്തിലുള്ള പോലീസും 1.500 കിലോഗ്രാമിലധികം കഞ്ചാവുമായി ടൗണ് പോലീസും ജില്ല ആന്റി നാര്ക്കോട്ടിക്ക് സെപഷ്യല് ആക്ഷന് ഫോഴ്സിന്റെ (ഡന്സാഫ്) സഹായത്തോടെ പിടികൂടി.
നരിക്കുനി സ്വദേശി വാടയക്കണ്ടിയില് മൊട്ട സുനി എന്ന സുനീഷ് (45), പുന്നശ്ശേരി സ്വദേശി അനോട്ട് പറമ്പത്ത് ദീപേഷ് കുമാര് (345) എന്നിവരെ കസബ പോലീസ് സ്റ്റേഷന് സബ് ഇന്സ്പെക്ടര് അഭിഷേകും, മലപ്പുറം മുതുവല്ലൂര് പാറകുളങ്ങര വീട്ടില് റിന്ഷാദിനെ (28) ടൗണ് പോലീസ് സബ്ബ് ഇന്സ്പെക്ടര് സുഭാഷ് ചന്ദ്രനും അറസ്റ്റ് ചെയ്തു.
ജില്ലാ പോലീസ് മേധാവി ഡി ഐ ജി എ.അക്ബര് ഐ പി എസിന്റ നിര്ദ്ദേശപ്രകാരം നടന്ന പരിശോധനയിലാണ് പ്രതികള് പിടിയിലാവുന്നത്. പിടിച്ചെടുത്ത കഞ്ചാവിന് കിലോഗ്രാമിന് ചില്ലറ വിപണിയില് മുപ്പതിനായിരത്തോളം രൂപ വില വരും. ടൗണ് സ്റ്റേഷനില് പിടിയിലായി റിന്ഷാദിന് നിരവധി കഞ്ചാവു കേസുകളും മോഷണ കേസുകളും നിലവിലുണ്ട്. അടുത്തിടെ ജയില് മോചിതനായത്.
കസബ പോലീസ് സ്റ്റേഷനില് പിടിയിലായ സുനീഷ് ജില്ലയുടെ വിവിധ ഭാഗങ്ങളിലേക്ക് കഞ്ചാവുകടത്തുന്ന സംഘത്തിലെ മുഖ്യ കണ്ണിയാണ്.നരിക്കുനി, പുന്നശ്ശേരി, കാക്കൂര് ഭാഗങ്ങളില് ചില്ലറ വില്പന നടന്നുന്നത് ഇവരുടെ സംഘമാണ്.കൂടാതെ ഇവര്ക്ക് കഞ്ചാവ് എത്തിച്ച് നല്കുന്നവരെ കുറിച്ചും ഇവരുടെ സംഘത്തില്പ്പെട്ട സ്ത്രീകളെ കുറിച്ചും ഇവരോട് കഞ്ചാവ് വാങ്ങി ചില്ലറ വില്പന നടത്തുന്നവരെ കുറിച്ചുള്ള വ്യക്തമായ സൂചന പോലീസിന് ലഭിച്ചിട്ടുണ്ടെന്നും അത്തരം ആളുകളെ പോലീസ് നിരീക്ഷിച്ച് നടപടി സ്വീകരിക്കുന്നതുമാണെന്ന് ടൗണ് അസിസ്റ്റന്റ് കമ്മീഷണര് പി.ബിജുരാജ് പറഞ്ഞു.
ബാംഗ്ലൂരില് നിന്നും കുറഞ്ഞ വിലക്ക് കഞ്ചാവ് കൂടുതലായി കൊണ്ടുവന്ന് അമിത ആദായത്തില് ചെറുകിട സംഘങ്ങള്ക്ക് വില്പന നടത്തുന്നതാണ് ഇവരുടെ രീതി.കഴിഞ്ഞ മൂന്ന് മാസത്തിനിടക്ക് നാര്ക്കോ ട്ടിക്ക് അസിസ്റ്റന്റ് കമ്മീഷണര് പി.പ്രകാശന് പടന്നയിലിന്റെ നേതൃത്വത്തില് ഡന്സാഫ് മുപ്പത് കിലോയിലധികം കഞ്ചാവും, മറ്റ് ന്യൂജന് സിന്തറ്റിക്ക് ലഹരി വസ്തുക്കളും,നിരോധിത പുകയില ഉല്പന്നങ്ങളും പിടികൂടി പ്രതികളെ നിയമത്തിനു മുന്നില് കൊണ്ടു വന്നിരുന്നു.
കോഴിക്കോട് സിറ്റി ഡന്സാഫ് അസിസ്റ്റന്റ് എസ്ഐ മനോജ് എടയേടത്ത്, സീനിയര് സിപിഒ കെ.അഖിലേഷ്, സിപിഒമാരായ ജിനേഷ് ചൂലൂര്, അര്ജുന് അജിത്ത്, കാരയില് സുനോജ്, സിറ്റി ക്രൈം സ്ക്വാഡ് അംഗങ്ങളായ എം.ഷാലു, എ.പ്രശാന്ത്കുമാര്, സി.കെ.സുജിത്ത്, ഷാഫി പറമ്പത്ത് കസബ സബ് ഇന്സ്പെക്ടര്മാരായ ആന്റണി, ആല്ബിന് സി.പിഒ സന്ദീപ് സെബാസ്റ്റ്യന് ടൗണ് പോലീസ് സ്റ്റേഷനിലെ സജേഷ്, ഷിഹാബ്, ഉല്ലാസ് എന്നിവരടങ്ങിയ അന്വേഷണ സംഘമാണ് പിടികൂടിയത്.
