പാലക്കാട്- കേന്ദ്ര, സംസ്ഥാന പദ്ധതികളുടെ നടത്തിപ്പു വിലയിരുത്താനും പരാതികളിലും ക്രമക്കേടുകളിലും ഇടപെട്ട് സര്ക്കാരിന്റെ നടപടി ഉറപ്പാക്കാനും ബിജെപി നിഴല് മന്ത്രിസഭ ഒരുക്കുന്നു. സംസ്ഥാന പ്രസിഡന്റ് കെ.സുരേന്ദ്രനാണ് ഈ ആശയം അവതരിപ്പിച്ചത്. ഓരോ വകുപ്പിന്റെയും ചുമതല ലോക്സഭ, നിയമസഭാ മണ്ഡലം തലത്തില് നേതാക്കള്ക്കു നല്കും.
ബിജെപിക്കു നിയമസഭയില് പ്രതിനിധികളില്ലാത്തതിനാല് പ്രശ്നങ്ങളില് പുറത്തുനിന്ന് ഇടപെടാനും പരിഹരിക്കുന്നതിനു ജനങ്ങള്ക്കൊപ്പം നില്ക്കാനുമുള്ള സംവിധാനമാണു നിഴല്മന്ത്രിസഭ കൊണ്ടു ലക്ഷ്യമിടുന്നത്. ഓരോ വിഷയത്തിനും കൃത്യമായ നയമുണ്ടാക്കാന് പാലക്കാട്ട് നടന്ന ബിജെപി സംസ്ഥാന നേതൃശിബിരത്തില് ധാരണയായിരുന്നു.
പുതിയ കേരളത്തെക്കുറിച്ച് അക്കാദമിക, രാഷ്ട്രീയതല കാഴ്ചപ്പാടുകള്ക്കു രൂപം നല്കും. വികസന, ദൈനംദിന പ്രശ്നങ്ങളില് ഇടപെട്ട് ജനത്തിനൊപ്പം നില്ക്കാനാണ് നിഴല്മന്ത്രിസഭ. വിരമിച്ച സിവില് സര്വീസ് ഉദ്യോഗസ്ഥരെയും വിദഗ്ധരെയും ഉള്പ്പെടുത്തി കേന്ദ്രസഹായത്തോടെ പുതിയ കേരളത്തിനുള്ള സമഗ്രരൂപരേഖയുണ്ടാക്കും.
