തിരുവനന്തപുരം- കേരള ഫൈബര് ഒപ്റ്റിക് നെറ്റ് വര്ക്ക് ലിമിറ്റഡിന് (കെ-ഫോണ്) അടിസ്ഥാന സൗകര്യ സേവനങ്ങള് നല്കുന്നതിനാവശ്യമായ ഇന്ഫ്രാസ്ട്രക്ചര് പ്രൊവൈഡര് കാറ്റഗറി 1 ലൈസന്സ് അനുവദിച്ച് കേന്ദ്ര ടെലികമ്മ്യൂണിക്കേഷന്സ് വകുപ്പിന്റെ ഉത്തരവിറങ്ങി. മുഖ്യമന്ത്രി പിണറായി വിജയനാണ് ഇക്കാര്യം ഫെയ്സ്ബുക്ക് കുറിപ്പിലൂടെ അറിയിച്ചത്.
പദ്ധതിക്കുള്ള ഇന്റര്നെറ്റ് സര്വീസ് പ്രൊവൈഡര് ലൈസന്സ് അധികം വൈകാതെ ലഭ്യമാവുമെന്നാണ് പ്രതീക്ഷിക്കപ്പെടുന്നത്. അതിവേഗ ഇന്റര്നെറ്റ് സൗജന്യമായും കുറഞ്ഞനിരക്കിലും ഗുണമേന്മയോടുകൂടിയും പരമാവധി പേര്ക്ക് ലഭ്യമാക്കാനാണ് പദ്ധതിയിലൂടെ ലക്ഷ്യംവെക്കുന്നത്. കേന്ദ്ര ടെലി കമ്മ്യൂണിക്കേഷന് വകുപ്പിന്റെ ഔദ്യോഗിക രജിസ്ട്രേഷന് പ്രകാരം, കെ ഫോണിന് ഫൈബര് ഒപ്റ്റിക് ലൈനുകള് (ഡാര്ക്ക് ഫൈബര്), ഡക്ട് സ്പേസ്, ടവറുകള്, നെറ്റ് വര്ക്ക് ശൃംഖല, മറ്റ് ആവശ്യ സംവിധാനങ്ങള് തുടങ്ങിയവ സ്വന്തമാക്കാനും തയ്യാറാക്കാനും നിലനിര്ത്താനും അറ്റകുറ്റപ്പണികള് നടത്താനും ഇവ ടെലികോം സര്വീസ് ലൈസന്സ് ഉള്ളവര്ക്ക് വാടകയ്ക്കോ ലീസിനോ നല്കുവാനും അല്ലെങ്കില് വില്ക്കുവാനുമുള്ള അധികാരമുണ്ടാകും.
സ്വകാര്യ കേബിള് ശൃംഖലകളുടെയും മൊബൈല് സേവനദാതാക്കളുടെയും ചൂഷണം കുറയ്ക്കാനാണ് കെ ഫോണ് വിഭാവനം ചെയ്തത്.
