കാസര്കോട്- കുമ്പള മുഗുവിലെ അബൂബക്കര് സിദ്ദിഖിനെ (32) കെട്ടിയിട്ടു മര്ദ്ദിച്ച് കൊലപ്പെടുത്തിയ കേസില് മുഖ്യപ്രതികളായ മൂന്ന് പേര് കൂടി അറസ്റ്റിലായി. ക്വട്ടേഷന് നല്കിയ സംഘത്തിലെ മൂന്ന് പേരാണ് അറസ്റ്റിലായത്. മഞ്ചേശ്വരം ഉദ്യാവര് ജെ.എം റോഡ് റസീന മന്സിലിലെ റിയാസ് ഹസന് (33), ഉപ്പള ഭഗവതി ടെമ്പിള് ബി ടി റോഡ് ന്യൂ റഹ്മത്ത് മന്സിലിലെ അബ്ദുല് റസാഖ് (46), കുഞ്ചത്തൂര് ദൈഗ്ലോറി നവാസ് മന്സിലിലെ അബൂബക്കര് സിദ്ദിഖ് (33) എന്നിവരെയാണ് ജില്ലാ പൊലീസ് മേധാവി ഡോ.വൈഭവ് സക്സേനയുടെ നേതൃത്വത്തിലുള്ള പ്രത്യേക അന്വേഷണ സംഘം പിടികൂടിയത്. ഇതോടെ കൊലക്കേസില് അറസ്റ്റിലായവരുടെ എണ്ണം അഞ്ചായി. ഉദ്യാവര് ജെ.എം റോഡിലെ അബ്ദുല് അസീസ് (36), അബ്ദുല് റഹീം (41) എന്നിവരാണ് കഴിഞ്ഞ ദിവസം അറസ്റ്റിലായത്. അബൂബക്കര് സിദ്ദിഖിനെ കൊലപ്പെടുത്താന് ക്വട്ടേഷന് നല്കിയ സംഘത്തിലെ പ്രധാനികളാണ് ഇന്ന് അറസ്റ്റിലായവരെന്ന് പോലീസ് പറഞ്ഞു.
സംഘത്തിലെ ഏതാനും പേര് ഗള്ഫിലേക്ക് കടന്നതായാണ് സംശയം. സ്വര്ണക്കടത്ത് സംഘത്തിന് ഗോവ, പൂന, ബംഗളൂരു എന്നിവിടങ്ങളില് വേരുകളുണ്ട്. അബൂബക്കര് സിദ്ദിഖിനെ കൊലപ്പെടുത്തിയ കേസിലെ പ്രതികള്ക്ക് ഇവിടങ്ങളില്നിന്ന് ഗള്ഫിലേക്ക് കടക്കാന് ആവശ്യമായ സഹായം ലഭിച്ചിട്ടുണ്ടെന്നാണ് പോലീസ് കരുതുന്നത്. പോലീസ് സ്ക്വാഡുകള് ഈ ഭാഗങ്ങളിലെല്ലാം അന്വേഷണം തുടരുന്നുണ്ട്. പ്രതികളുടെ ഫോണുകളെല്ലാം സ്വിച്ച് ഓഫ് ചെയ്ത നിലയിലാണ്. മറ്റു പ്രതികളെ കണ്ടെത്താന് അന്വേഷണം ഊര്ജിതമാക്കിയിട്ടുണ്ടെന്നും കേസുമായി ബന്ധപ്പെട്ട മറ്റു വിശദാംശങ്ങള് വെളിപ്പെടുത്താന് സമയമായിട്ടില്ലെന്നും ജില്ലാ പൊലീസ് മേധാവി വൈഭവ് സക്സേന പറഞ്ഞു.
