ദമാം- വാണിജ്യ, നിക്ഷേപ മന്ത്രാലയത്തിൽ രജിസ്റ്റർ ചെയ്ത ട്രേഡ് മാർക്ക് മുദ്രണം ചെയ്ത വ്യാജ ജെന്റ്‌സ് റെഡിമെയ്ഡ് വസ്ത്രങ്ങൾ വിൽപന നടത്തിയ കേസിൽ സൗദി കമ്പനിക്ക് പിഴ ചുമത്തി. ദമാമിൽ ജെന്റ്‌സ് റെഡിമെയ്ഡ് വസ്ത്രങ്ങളുടെ മൊത്ത, ചില്ലറ വ്യാപാര മേഖലയിൽ പ്രവർത്തിക്കുന്ന ആലമുത്തൗഫീർ ട്രേഡിംഗ് കമ്പനിക്കാണ് ഒരു ലക്ഷം റിയാൽ പിഴ ചുമത്തിയത്. സൗദി പൗരൻ തുർക്കി നായിഫ് അൽശമ്മരിയുടെ ഉടമസ്ഥതയിലുള്ളതാണ് സ്ഥാപനം.
വ്യാജ ഉൽപന്നങ്ങൾ കണ്ടുകെട്ടുന്നതിനും ദമാം ക്രിമിനൽ കോടതി വിധിച്ചു. കമ്പനിയുടെ പേരുവിവരങ്ങളും കമ്പനി നടത്തിയ നിയമ ലംഘനവും ഇതിനുള്ള ശിക്ഷയും കമ്പനി ഉടമകളുടെ സ്വന്തം ചെലവിൽ രണ്ടു പ്രാദേശിക പത്രങ്ങളിൽ പരസ്യം ചെയ്യുന്നതിനും വിധിയുണ്ട്. തങ്ങളുടെ ട്രേഡ് മാർക്ക് ദുരുപയോഗം ചെയ്യുന്ന സ്ഥാപനത്തിനെതിരെ ജെന്റ്‌സ് റെഡിമെയ്ഡ് വസ്ത്ര വ്യാപാര മേഖലയിൽ പ്രവർത്തിക്കുന്ന കമ്പനി വാണിജ്യ, നിക്ഷേപ മന്ത്രാലയത്തിന് പരാതി നൽകുകയായിരുന്നു. തുടർന്ന് ഉദ്യോഗസ്ഥർ നടത്തിയ പരിശോധനയിൽ കമ്പനിയിൽ വ്യാജ ഉൽപന്നങ്ങൾ കണ്ടെത്തി. കമ്പനിക്കു കീഴിലെ ദമാമിലെ ഷോപ്പിൽ വിൽപനക്ക് പ്രദർശിപ്പിച്ച 800 വ്യാജ റെഡിമെയ്ഡ് വസ്ത്രങ്ങൾ മന്ത്രാലയ ഉദ്യോഗസ്ഥർ പിടിച്ചെടുത്തിരുന്നു. തുടർന്ന് പ്രാഥമികാന്വേഷണം പൂർത്തിയാക്കി, കമ്പനിക്കെതിരായ കേസ് നിയമ നടപടികൾക്ക് പബ്ലിക് പ്രോസിക്യൂഷന് കൈമാറുകയായിരുന്നു.
ഉപയോക്താക്കളെ കബളിപ്പിക്കുന്നതിന് വ്യാജ ട്രേഡ് മാർക്കുകൾ നിർമിക്കുന്നവർക്കും വ്യാജ ഉൽപന്നങ്ങൾ വിൽപനക്ക് പ്രദർശിപ്പിക്കുന്നവർക്കും കൈവശം വെക്കുന്നവർക്കും ഒരു വർഷം വരെ തടവും അര ലക്ഷം റിയാൽ മുതൽ പത്തു ലക്ഷം റിയാൽ വരെ പിഴയും ശിക്ഷ നൽകുന്നതിന് ട്രേഡ് മാർക്ക് നിയമത്തിലെ 43 ാം വകുപ്പ് അനുശാസിക്കുന്നുണ്ട്. വ്യാജ ഉൽപന്നങ്ങൾ വിൽക്കുന്ന സ്ഥാപനങ്ങളെക്കുറിച്ച് 1900 എന്ന നമ്പറിൽ കംപ്ലയിന്റ്‌സ് സെന്ററിൽ ബന്ധപ്പെട്ടോ വാണിജ്യ, നിക്ഷേപ മന്ത്രാലയം പുറത്തിറക്കിയ ആപ്ലിക്കേഷൻ വഴിയോ പരാതികൾ നൽകണമെന്ന് മന്ത്രാലയം ഉപയോക്താക്കളോട് ആവശ്യപ്പെട്ടു.
