കോഴിക്കോട്- കേരളത്തിലെ സ്കൂളുകളില് ഇന്ന് പ്രവേശനോത്സവം. മധ്യവേനലവധിക്കുശേഷം സ്കൂളുകളിലെത്തുന്ന കുരുന്നുകളെ വരവേല്ക്കാന് വന് ഒരുക്കങ്ങളാണ് നടത്തിയിരിക്കുന്നത്. പ്രവേശനോത്സവത്തിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയന് നിര്വഹിക്കും. തിരുവനന്തപുരത്തെ കഴക്കൂട്ടം ഗവ. ഹയര് സെക്കന്ഡറി സ്കൂളില് വച്ചാണ് ഉദ്ഘാടനം.
കുട്ടികള് തിരിച്ചെത്തുന്നത് ആഘോഷമാക്കാനുള്ള എല്ലാ ഒരുക്കങ്ങളും പൂര്ത്തിയായതായി പൊതുവിദ്യാഭ്യാസമന്ത്രി വി ശിവന്കുട്ടി പറഞ്ഞു. നാല് ലക്ഷത്തോളം കുട്ടികളാണ് ഇന്ന് ഒന്നാം ക്ലാസിലേക്ക് പ്രവേശിക്കാനിരിക്കുന്നത്.
സ്കൂള് തുറക്കുമ്പോള് പാലിക്കേണ്ട മാനദണ്ഡങ്ങള് സംബന്ധിച്ചു വിശദമായ സര്ക്കുലര് പുറപ്പെടുവിച്ചിട്ടുണ്ട്. വിദ്യാലയ അന്തരീക്ഷം മെച്ചപ്പെടുത്തുന്നതുള്ള ക്രമീകരണങ്ങള്ക്കായി വിവിധ സര്ക്കാര് വകുപ്പുകളുടെ ഏകോപനത്തിനുള്ള ചര്ച്ചകള് ഇന്നലെ പൂര്ത്തിയാക്കിയിരുന്നു. കുട്ടികള്ക്ക് ആവശ്യമായ പാഠപുസ്തകങ്ങളും യൂണിഫോമും എത്തിക്കഴിഞ്ഞു. യു.പി, എല്.പി. അധ്യാപകരുടെ പരിശീലം പൂര്ത്തിയാക്കി. ഹൈസ്കള്, ഹയര് സെക്കന്ഡറി അധ്യാപകര്ക്കു സ്കൂള് തുറന്ന ശേഷം പരിശീലനം നല്കും. എയ്ഡഡ് സ്കൂളുകളിലെ നിയമനങ്ങള് അടക്കം മാനേജ്മെന്റിന്റെ ഒരു അവകാശവും സര്ക്കാര് കവര്ന്നെടുക്കില്ല. സ്കൂളുകളില് പി.ടി.എ. ഫണ്ട് പിരിവിന്റെ പേരില് കുട്ടികള്ക്കു ബുദ്ധിമുട്ടുണ്ടാക്കുന്ന ഒരു നടപടിയുമുണ്ടാകരുതെന്നും മന്ത്രി പറഞ്ഞു.
