ന്യൂദല്‍ഹി- അന്താരാഷ്ട്ര നാണയനിധി - ലോക ബാങ്ക് വസന്തകാല യോഗത്തിനെത്തിയ കേന്ദ്ര ധനകാര്യ, കോര്‍പ്പറേറ്റ്കാര്യ മന്ത്രി നിര്‍മ്മല സീതാരാമന്‍, അന്താരാഷ്ട്ര നാണയനിധി മാനേജിംഗ് ഡയറക്ടര്‍ ക്രിസ്റ്റലീന ജോര്‍ജീവയുമായി വാഷിംഗ്ടണ്‍ ഡിസിയില്‍ ഉഭയകക്ഷി ചര്‍ച്ച നടത്തി.
ആഗോള, പ്രാദേശിക സമ്പദ്വ്യവസ്ഥകള്‍ ഇപ്പോള്‍ അഭിമുഖീകരിക്കുന്ന ബഹുമുഖമായ പ്രശ്നങ്ങളും, ഇന്ത്യയെ സംബന്ധിച്ച് പ്രാധാന്യമുള്ള വിഷയങ്ങളും ചര്‍ച്ചയായി.
കോവിഡ്-19 മഹാമാരി ഉയര്‍ത്തുന്ന വെല്ലുവിളികള്‍ക്കിടയിലും ആഗോളതലത്തില്‍ അതിവേഗം വളരുന്ന സമ്പദ് വ്യവസ്ഥയായി തുടരുന്ന ഇന്ത്യയുടെ അതിജീവന ശേഷി ജോര്‍ജീവ എടുത്തുപറഞ്ഞു. എം.എം.എഫിന്റെ ശേഷി വികസന പ്രവര്‍ത്തനങ്ങളില്‍ ഇന്ത്യ നല്‍കിയ സംഭാവനകളെ അവര്‍ അഭിനന്ദിച്ചു.
അന്താരാഷ്ട്ര നാണയനിധി ശ്രീലങ്കയെ പിന്തുണക്കേണ്ടതിന്റെയും അടിയന്തര സാമ്പത്തിക സഹായം ലഭ്യമാക്കേണ്ടതിന്റെയും ആവശ്യകത നിര്‍മല സീതാരാമന്‍ ചര്‍ച്ചയില്‍ സൂചിപ്പിച്ചു.
