കാസര്‍കോട് - വിഷുക്കാലത്ത് പൂഴ്ത്തിവെപ്പും കൃത്രിമ വിലക്കയറ്റവും തടയുന്നതിന് ഭക്ഷ്യ സിവില്‍ സപ്ലൈസ് മന്ത്രി ജി.ആര്‍ അനിലിന്റെ നിര്‍ദേശം വന്നതിന് പിന്നാലെ കാസര്‍കോട് കലക്ടര്‍ കടകളില്‍ നേരിട്ടിറങ്ങി പരിശോധന നടത്തി. കാസര്‍കോട് നഗരത്തിലെ കടകളിലാണ് ജില്ലാ കലക്ടര്‍ ഭണ്ഡാരി സ്വാഗത് രണ്‍വീര്‍ചന്ദിന്റെ നേതൃത്വത്തില്‍ പരിശോധന നടന്നത്. കരിഞ്ചന്ത, പൂഴ്ത്തിവെപ്പ്, വിലക്കയറ്റം എന്നിവ കര്‍ശനമായി തടയുമെന്ന് ജില്ലാ കലക്ടര്‍ ഭണ്ഡാരി സ്വാഗത് രണ്‍വീര്‍ചന്ദ് അറിയിച്ചു. അനിയന്ത്രിതമായ വിലവര്‍ധനവ് പൊതുമാര്‍ക്കറ്റില്‍ അനുവദിക്കാനാകില്ലെന്നും കര്‍ശന നടപടി സ്വീകരിക്കുമെന്നും കലക്ടര്‍ പറഞ്ഞു. ജില്ലയില്‍ പരിശോധന വ്യാപകമാക്കും.
പലവ്യഞ്ജന കടകള്‍, പച്ചക്കറി കടകള്‍, ഇറച്ചിക്കടകള്‍, മത്സ്യമാര്‍ക്കറ്റുകള്‍, ഹോട്ടലുകള്‍ എന്നിവിടങ്ങളിലാണ് ജില്ലാ കലക്ടറുടെ നേതൃത്വത്തില്‍ പരിശോധന നടത്തിയത്. ടൗണിലെ ചില കടകളില്‍ ഉള്ളിക്ക് 22 രൂപ, 26 രൂപ എന്നിങ്ങനെ വ്യത്യസ്ത നിരക്കുകള്‍ ഈടാക്കുന്നതായി പരിശോധനയില്‍ കണ്ടെത്തി. കയ്യോടെ പിടികൂടിയ കടക്കെതിരെ നടപടി സ്വീകരിക്കാന്‍ ജില്ലാ സപ്ലൈ ഓഫീസര്‍ക്ക് കലക്ടര്‍ ഉടന്‍ നിര്‍ദ്ദേശം നല്‍കി. പരിശോധന ശക്തമാക്കുന്നതിനായി എല്ലായിടങ്ങളിലും സംയുക്ത സ്‌ക്വാഡുകള്‍ രൂപീകരിക്കും.
