തൃശൂര്- നര്ത്തകി മന്സിയക്ക് കൂടല്മാണിക്യം ഉത്സവത്തോടനുബന്ധിച്ചുള്ള നൃത്തോത്സവത്തില് പങ്കെടുക്കാന് അവസരം നിഷേധിച്ചതിന് പിന്നാലെ ക്ഷേത്രം തന്ത്രി പ്രതിനിധി രാജിവെച്ചു. മന്സിയക്ക് അവസരം നിഷേധിച്ചതില് ഇടതുപക്ഷം നേതൃത്വം നല്കുന്ന ഭരണസമിതിയില് തര്ക്കങ്ങളുണ്ടായിരുന്നു. ഇതിനു പിന്നാലെയാണ് രാജി.
തന്ത്രി പ്രതിനിധി എന്.പി.പി നമ്പൂതിരി ഭരണസമിതിയില് നിന്നാണ് രാജിവെച്ചത്.
ഹൈന്ദവരായ കലാകാരന്മാര്ക്കാണ് പരിപാടി അവതരിപ്പിക്കാന് അവസരമെന്ന് വ്യക്തമായിയാണ് പത്ര പരസ്യം എന്നായിരുന്നു സംഭവത്തില് കൂടല്മാണിക്യം ദേവസ്വം ചെയര്മാന്റെ വിശദീകരണം.
പരിപാടിക്കായി എഗ്രിമെന്റ് ഉണ്ടാക്കുന്ന സമയത്താണ് നര്ത്തകി തന്റെ പശ്ചാത്തലം വെളിപ്പെടുത്തുന്നതും മതമില്ലാതെയാണ് ജീവിക്കുന്നത് എന്ന് അറിയിക്കുന്നതും. ക്ഷേത്ര മതിലിനകത്തെ കൂത്തമ്പലത്തിലാണ് പരിപാടി നടക്കുന്നത്.
നിലനില്ക്കുന്ന ആചാരനുഷ്ടാനങ്ങള് പ്രകാരം ക്ഷേത്രത്തിനകത്ത് അഹിന്ദുക്കള്ക്ക് പ്രവേശനമില്ലെന്നും അദ്ദേഹം വ്യക്തമാക്കിയിരുന്നു.
ഏപ്രില് 21ന് ആറാം ഉത്സവദിനത്തില് ഉച്ചക്കുശേഷം നാലുമുതല് അഞ്ചുവരെ ഭരതനാട്യം അവതരിപ്പിക്കാന് നോട്ടീസിലടക്കം പേര് അച്ചടിച്ച ശേഷമാണ് ക്ഷേത്ര ഭാരവാഹികള് മന്സിയക്ക് അവസരം നിഷേധിച്ചത്.