ജയ്പുര്- രാജസ്ഥാന് സര്ക്കാരിനെ നാണക്കേടിലേക്ക് തള്ളിവിട്ട് കോണ്ഗ്രസ് എം.എല്.എയുടെ മകനെതിരേ പ്രായപൂര്ത്തിയാകാത്ത പെണ്കുട്ടിയുടെ ബലാത്സംഗ പരാതി. രാജ്ഗഢ്-ലക്ഷ്മണ്ഗഢ് എം.എല്.എ. ജൊഹാരി ലാല് മീണയുടെ മകന് ദീപക് മീണക്കെതിരേയാണ് പതിനഞ്ചുകാരി പരാതി നല്കിയത്. കഴിഞ്ഞ വര്ഷമാണ് പീഡനം നടന്നതെന്ന് പെണ്കുട്ടി പറയുന്നു. മാര്ച്ച് 20 നാണ് പെണ്കുട്ടി പോലീസില് പരാതി നല്കിയത്.
ഹോട്ടലില് എത്തിച്ച് മയക്കുമരുന്നു നല്കി ബോധരഹിതയാക്കുകയും ബലാത്സംഗം ചെയ്യുകയുമായിരുന്നു എന്നാണ് പെണ്കുട്ടി പരാതിയില് പറയുന്നത്. സംഭവത്തിനു ശേഷം ദീപക് തന്നെ ബ്ലാക്ക് മെയില് ചെയ്യുകയും സ്വര്ണവും പണവും തട്ടിയെടുക്കുകയും ചെയ്തെന്നും പെണ്കുട്ടിയുടെ പരാതിയിലുണ്ട്. ചിത്രങ്ങള് സാമൂഹിക മാധ്യമങ്ങളില് പ്രചരിപ്പിക്കുമെന്ന് ഭീഷണിപ്പെടുത്തിയിരുന്നെന്നും പെണ്കുട്ടി പറയുന്നു.
പരാതിയില് എഫ്.ഐ.ആര് രജിസ്റ്റര് ചെയ്യപ്പെട്ടെങ്കിലും ഇതുവരെ അറസ്റ്റുകളൊന്നും നടന്നിട്ടില്ല. അന്വേഷണം പുരോഗമിക്കുകയാണെന്നാണ് പോലീസ് വൃത്തങ്ങള് നല്കുന്ന മറുപടി.
