കണ്ണൂര് - മാരക മയക്കുമരുന്നായ എം.ഡി.എം.എ സഹിതം മൂന്നു യുവാക്കള് എക്സൈസ് സംഘത്തിന്റെ പിടിയിലായി. തലശേരി കതിരൂര് വേറ്റുമ്മല് ഷാദുലി മന്സിലില് മുഹമ്മദിന്റെ മകന് ടി.കെ.അനീഷ് (35) , കതിരൂര് പുലാട്ടെ സന മന്സിലില് റഷീദിന്റെ മകന് കെ.പി.റിസ്വാന് (28) , ഇരിട്ടി പഴശിയിലെ കരേറ്റ സ്വദേശി അടിയോട് വീട്ടില് ഹമീദിന്റെ മകന് പി.റയീസ് (26) എന്നിവരാണ് പിടിയിലായത്. ഇവര് സഞ്ചരിച്ച രണ്ട് കാറുകളും കസ്റ്റഡിയിലെടുത്തു പിണറായി എക്സൈസ് റെയിഞ്ച് ഇന്സ്പെക്ടര് ബി.ജിഹാദും സംഘവും തലശ്ശേരി മാങ്ങാട്ടിടം മൂന്നാംപീടികയില് വെച്ചാണ് ഇവരെ പിടികൂടിയത്. ഹോണ്ട സിവിക് കാര്, മാരുതി സുസുക്കി വാഗണര് കാറുകളില് കര്ണാടകയില് നിന്നും കടത്തികൊണ്ടുവന്ന 40 ഗ്രാം എം.ഡി. എം. എ യും ഇവരില് നിന്ന് പിടിച്ചെടുത്തു. രഹസ്യവിവരം ലഭിച്ചതിനെ തുടര്ന്ന് എക്സൈസ് സൈബര്സെല് ഏതാനും ദിവസങ്ങളായി ഇവരുടെ അന്തര് സംസ്ഥാനയാത്രകള് നിരീക്ഷിച്ചു വരികയായിരുന്നുകര്ണാടകയില് നിന്നും വന്തോതില് എം.ഡി.എം.എ അടക്കമുള്ള മയക്കുമരുന്ന് എത്തിച്ച് ജില്ലയിലെ വിവിധ സ്ഥലങ്ങളില് വിതരണം ചെയ്യുന്ന സംഘത്തിലെ കണ്ണികളാണ് ഇവരെന്ന് എക്സൈസ് സംഘം അറിയിച്ചു
