ആലപ്പുഴ- ജില്ലയിലെ മാരാരിക്കുളം, കണിച്ചുകുളങ്ങര എന്നിവിടങ്ങളില്‍നിന്ന് വന്‍ കഞ്ചാവ് ശേഖരം പിടികൂടി. മാരാരിക്കുളം പോലീസും ഡാന്‍സാഫ് സ്‌ക്വാഡും സംയുക്തമായി നടത്തിയ പരിശോധനയിലാണ് എട്ട് കിലോ കഞ്ചാവ് പിടികൂടിയത്. കഞ്ചാവ് വില്‍പ്പന നടത്തിയ മൂന്ന് പേരെ മാരാരിക്കുളം പോലീസ് അറസ്റ്റ് ചെയ്തു.
എറണാകുളം ഞാറയ്ക്കല്‍ കളത്തിവീട്ടില്‍ സുകന്യ (25), മലപ്പുറം മേല്‍മുറി അണ്ടിക്കാട്ടില്‍ ജുനൈദ് (26), മലപ്പുറം കോട്ടൂര്‍വെസ്റ്റ് കൊയ്‌നിപറമ്പില്‍ റിന്‍ഷാദ് (28) എന്നിവരെയാണ് പോലീസ് അറസ്റ്റ് ചെയ്തത്.
ആറ് ലക്ഷം രൂപ വിലവരുന്ന കഞ്ചാവാണ് പരിശോധനയില്‍ പിടിച്ചെടുത്തത്. രഹസ്യ വിവരം ലഭിച്ചതിന്റെ അടിസ്ഥാനത്തില്‍ ചേര്‍ത്തലയിലും പരിസരത്തും പോലീസ് നടത്തിയ വാഹന പരിശോധനക്കിടയിലാണ് കഞ്ചാവ് പിടികൂടിയത്. പ്രതികളെ കോവിഡ് പരിശോധനക്ക് ശേഷം കോടതിയില്‍ ഹാജരാക്കും.
