ന്യൂദല്‍ഹി- 1995 മുതല്‍ തുടര്‍ച്ചയായി വര്‍ദ്ധിച്ചുകൊണ്ടിരുന്ന ദരിദ്രരായ 20 ശതമാനം ഇന്ത്യന്‍ കുടുംബങ്ങളുടെ വാര്‍ഷിക വരുമാനം 2015-16 ലെ അവരുടെ നിലവാരത്തില്‍ നിന്ന് 2020-21 വര്‍ഷത്തില്‍ 53% ഇടിഞ്ഞു. സാമ്പത്തിക ഉദാരവല്‍ക്കരണത്തിനു ശേഷമുള്ള അഭൂതപൂര്‍വമായ പ്രവണതയാണിതെന്ന് വിദഗ്ധര്‍ പറയുന്നു.
അതേ അഞ്ച് വര്‍ഷത്തെ കാലയളവില്‍, ഏറ്റവും സമ്പന്നരായ 20 ശതമാനം ആളുകള്‍ക്ക് അവരുടെ വാര്‍ഷിക കുടുംബ വരുമാനം 39 % വര്‍ധിച്ചു. കോവിഡിന്റെ സാമ്പത്തിക ആഘാതം സാമ്പത്തിക രംഗത്തുണ്ടാക്കിയ അസന്തുലിതത്വത്തിലെ വ്യക്തമായി പ്രതിഫലിപ്പിക്കുന്ന കണക്കുകളാണിത്.
മുംബൈ ആസ്ഥാനമായുള്ള തിങ്ക്-ടാങ്കായ പീപ്പിള്‍സ് റിസര്‍ച്ച് ഓണ്‍ ഇന്ത്യയുടെ ഉപഭോക്തൃ സമ്പദ്വ്യവസ്ഥ നടത്തിയ സര്‍വേയിലാണ് ഈ കണക്കുകള്‍.
2021 ഏപ്രിലിനും ഒക്ടോബറിനും ഇടയിലുള്ള സര്‍വേയില്‍ ആദ്യ റൗണ്ടില്‍ 200,000 കുടുംബങ്ങളെയും രണ്ടാം റൗണ്ടില്‍ 42,000 വീടുകളെയും ഉള്‍പ്പെടുത്തി. 100 ജില്ലകളിലായി 120 പട്ടണങ്ങളിലും 800 ഗ്രാമങ്ങളിലുമായാണ് സര്‍വേ നടത്തിയത്.
