കോട്ടയം- കാമുകിയുമായി തെറ്റി യുവാവ് തൂങ്ങി മരിച്ചു. സംഭവ സമയത്ത് ഒപ്പമുണ്ടായിരുന്ന യുവതിക്കായി പോലീസ് അന്വേഷണം ആരംഭിച്ചു. വൈക്കം വെച്ചൂര് അംബികാ മാര്ക്കറ്റിന് സമീപം മാമ്പറയില് ഹേമാലയം വീട്ടില് പരേതനായ ഗിരീഷിന്റെ മകന് ഗോപു (22) ആണ് മരിച്ചത്.
കാണാതായ യുവതിയുടെ ബാഗും മൊബൈല്ഫോണും മാസ്കും ടവ്വലും മൃതദേഹം കണ്ടെത്തിയ പുരയിടത്തില്തന്നെ അല്പം മാറി ഉപേക്ഷിച്ചനിലയില് പോലീസ് കണ്ടെത്തിയിട്ടുണ്ട്. യുവാവിന്റേതെന്ന് കരുതുന്ന ആത്മഹത്യാക്കുറിപ്പും മൃതദേഹത്തില്നിന്ന് പോലീസിന് ലഭിച്ചു. യുവതിയുമായി വഴക്കുണ്ടായെന്നും ഇനി ജീവിച്ചിരിക്കില്ലെന്നുമാണ് കുറിപ്പില് പറയുന്നത്.
തിങ്കളാഴ്ച രാവിലെ 11 മണിയോടെ കുമരകം ചീപ്പുങ്കല് മാലിക്കായലിന് സമീപത്ത് ടൂറിസം വകുപ്പിന്റെ കാടുപിടിച്ചുകിടക്കുന്ന തകര്ന്ന കെട്ടിടത്തിലേക്ക് യുവാവും യുവതിയും കയറിപ്പോകുന്നത് നാട്ടുകാര് കണ്ടിരുന്നു. മണിക്കൂറുകള് കഴിഞ്ഞിട്ടും ഇരുവരെയും പുറത്തേക്ക് കാണാതായതോടെ നാട്ടുകാര് നടത്തിയ തിരച്ചിലിലാണ് യുവാവിനെ മരത്തില് തൂങ്ങിമരിച്ച നിലയില് കണ്ടെത്തിയത്.
സംഭവസ്ഥലത്ത് കണ്ടെത്തിയ ബാഗില്നിന്ന് ലഭിച്ച മൊബൈല്ഫോണ് പിന്തുടര്ന്നു നടത്തിയ അന്വേഷണത്തില് യുവതിയെ പോലീസ് തിരിച്ചറിഞ്ഞു. തുടര്ന്ന്, വീട്ടുകാരെ വിളിച്ചുവരുത്തി അന്വേഷണസംഘം വിവരങ്ങള് ശേഖരിച്ചു. എന്നാല്, യുവതിക്ക് പ്രണയമുണ്ടായിരുന്നതായി അറിയില്ലെന്നാണ് വീട്ടുകാര് പോലീസിനോട് പറഞ്ഞത്.
പെണ്കുട്ടി വെള്ളത്തില് വീണിട്ടുണ്ടാകാമെന്ന നിഗമനത്തില് നാട്ടുകാരുടെ സഹായത്തോടെ പോലീസ് തിങ്കളാഴ്ച വൈകീട്ട് തിരച്ചില് നടത്തിയെങ്കിലും കണ്ടെത്താനായില്ല. യുവാവ് തൂങ്ങുന്നതുകണ്ട് യുവതി ഭയന്നോടുന്നതിനിടെ വെള്ളത്തില് വീണിരിക്കാമെന്ന നിഗമനത്തിലാണ് പോലീസ്. നേരത്തേയുള്ള വഴക്കിനെത്തുടര്ന്ന് ജീവനൊടുക്കാനുള്ള തയ്യാറെടുപ്പിലായിരിക്കാം കയറുമായി യുവാവ് ഇവിടെയെത്തിയതെന്നാണ് അന്വേഷണസംഘം കരുതുന്നത്.
