ആലപ്പുഴ- ഇരട്ട കൊലപാതകങ്ങളുടെ പശ്ചാത്തലത്തില് ക്രിമിനല് നടപടിക്രമം 144 പ്രകാരം ആലപ്പുഴ ജില്ലയില് പ്രഖ്യാപിച്ചിരുന്ന നിരോധാജ്ഞ ഡിസംബര് 22ന് രാവിലെ ആറുവരെ ദീര്ഘിപ്പിച്ചു. ഇതു സംബന്ധിച്ച് ജില്ലാ കലക്ടര് എ. അലക്സാണ്ടര് ഉത്തരവ് പുറപ്പെടുവിച്ചു. ജില്ലയില് സംഘര്ഷ സാധ്യത നിലനില്ക്കുന്നതായുള്ള ജില്ലാ പോലീസ് മേധാവിയുടെ റിപ്പോര്ട്ടിന്റെ അടിസ്ഥാനത്തിലാണ് നടപടി.
ജില്ലയില് സമാധാനാന്തരീക്ഷം ഉറപ്പാക്കുന്നതിനായുള്ള സര്വ്വകക്ഷി യോഗം ചൊവ്വാഴ്ച വൈകുന്നേരം നാലിന് കലക്ടറേറ്റ് കോണ്ഫറന്സ് ഹാളില് ചേരുമെന്നും ജില്ലാ കലക്ടര് അറിയിച്ചിട്ടുണ്ട്. ജില്ലയുടെ ചുമതലയുള്ള ഫിഷറീസ്- സാംസ്കാരിക മന്ത്രി സജി ചെറിയാന്, കൃഷിമന്ത്രി പി. പ്രസാദ് എന്നിവരുടെ സാന്നിധ്യത്തില് ചേരുന്ന യോഗത്തില് എം.പിമാര്, എം.എല്.എമാര്, മറ്റു ജനപ്രതിനിധികള്, രാഷ്ട്രീയ പാര്ട്ടി പ്രതിനിധികള് തുടങ്ങിയവര് പങ്കെടുക്കും.
