കണ്ണൂർ-പേരാവൂരിനടുത്ത് മേലേ തൊണ്ടിയിൽ യുവതിയെ വീട്ടുമുറ്റത്ത് പൊള്ളലേറ്റു മരിച്ച നിലയിൽ കണ്ടെത്തി. മുച്ചിലോട്ട് ഭഗവതി ക്ഷേത്രത്തിന് സമീപം കുഞ്ഞിംവീട്ടിൽ ദീപേഷിന്റെ ഭാര്യ നിഷ (24)യാണ് മരിച്ചത്. രാവിലെ അമ്പലത്തിലേക്ക് പോകുന്ന ഒരാളാണ് ദേഹമാസകലം തീ പിടിച്ച് മുറ്റത്തേക്ക് ഓടുന്ന നിഷയെ ആദ്യം കണ്ടത്. തുടർന്ന് അയൽവാസികളും മറ്റും എത്തിയപ്പോഴേക്കും യുവതി മുറ്റത്ത് വീണ് മരിച്ചു. പേരാവൂർ പോലീസ് സ്ഥലത്തെത്തി പ്രാഥമിക പരിശോധനകൾക്ക് ശേഷം പോസ്റ്റുമാർട്ടത്തിനായി മൃതദേഹം പരിയാരം മെഡിക്കൽ കോളേജിലേക്ക് മാറ്റി. ആറളം പുനരധിവാസ മേഖലയിലെ നാരായണന്റെയും സുജാതയുടെയും മകളാണ്. ധന്യ, ധനുഷ എന്നിവർ സഹോദരങ്ങളാണ്. മൂന്നു വർഷം മുമ്പാണ് വിവാഹിതയായത്.
സംഭവ സമയം വീട്ടിൽ നിഷയുടെ ഭർത്താവ് ദീപേഷ്, ഒന്നര വയസുള്ള മകൻ ദേവാംഗ്, ഭർത്താവിന്റെ അമ്മ , സഹോദരൻ എന്നിവരാണ് വീട്ടിൽ ഉണ്ടായിരുന്നത്. സംഭവത്തിൽ ദുരൂഹതയുണ്ടെന്ന് യുവതിയുടെ ബന്ധുക്കൾ പരാതിപ്പെട്ടതിനെത്തുടർന്ന് അസ്വാഭാവിക മരണത്തിന് പോലീസ് കേസെടുത്തു.
