ന്യൂദല്ഹി- ബി.ജെ.പി നല്കിയ പരാതിയെ തുടര്ന്ന് ഗുഡ്ഗാവ് കോമഡി ഫെസ്റ്റില്നിന്ന് സ്റ്റാന്ഡപ്പ് കൊമേഡിയന് മുനവ്വര് ഫാറൂഖിയെ ഒഴിവാക്കി. പൊതുസുരക്ഷ പരിഗണിച്ചാണ് നടപടിയെന്ന് സംഘാടകര് അവകാശപ്പെട്ടു.
ഈ മാസം 19ന് ഗുരുഗ്രാമിലെ സോഹ്ന റോഡിലുള്ള ആര്യ മാളിലാണ് ഗുഡ്ഗാവ് കോമഡി ഫെസ്റ്റ്. പരിപാടിയില് മുനവ്വര് ഫാറൂഖിയെ ഒഴിവാക്കണമെന്നാവശ്യപ്പെട്ട് നിരന്തരം ഫോണ് കോളുകളും സന്ദേശങ്ങളും ലഭിച്ചതായി സംഘാടകര് പറഞ്ഞു. പ്രചാരണ പോസ്റ്ററുകളില് നിന്ന് മുനവ്വര് ഫാറൂഖിയുടെ പേര് നീക്കം ചെയ്തിട്ടുണ്ട്. മുനവ്വര് ഫാറൂഖി പങ്കെടുക്കുന്ന ഷോ റദ്ദാക്കണമെന്ന് ആവശ്യപ്പെട്ട് തിങ്കളാഴ്ച ഗുരുഗ്രാം പോലീസില് ബി.ജെ.പി പരാതി നല്കിയിരുന്നു.
സംഭവം ദൗര്ഭാഗ്യകരമാണെന്ന് കോണ്ഗ്രസ് നേതാവും എം.പിയുമായ ശശി തരൂര് പറഞ്ഞു. ആവിഷ്കാര സ്വാതന്ത്ര്യത്തെ പല രീതിയിലും തടയുകയാണ്. സ്റ്റാന്ഡ് അപ് കൊമേഡിയന്റെ വേദി തടയുന്നത് അല്പത്തരവും ലജ്ജാകരവുമാണെന്നും അദ്ദേഹം പറഞ്ഞു.
ഹിന്ദു ദൈവങ്ങളേയും ബി.ജെ.പി നേതാവ് അമിത് ഷായേയും അപമാനിച്ച് സംസാരിച്ചുവെന്ന് ആരോപിച്ച് 2021 ജനുവരി മുതലാണ് മുനവ്വര് ഫാറൂഖിക്കെതിരെ സംഘ്പരിവാര് ആക്രമണം ആരംഭിച്ചത്. സംഘ്പരിവാര് പരാതിയില് മുനവ്വര് ഫാറൂഖിയെ നേരത്തെ അറസ്റ്റ് ചെയ്തിരുന്നു.
