നെടുമ്പാശ്ശേരി-കൊറോണ വൈറസിന്റെ മാരകമായ പുതിയ വകഭേദം ഒമിക്രോണ്‍ വിദേശ രാജ്യങ്ങളില്‍ വ്യാപകമായതോടെ ഈ രാജ്യങ്ങളില്‍ നിന്നെത്തുന്നവര്‍ക്ക് വിമാനത്താവളങ്ങളില്‍ പരിശോധന കര്‍ശനമാക്കി. ബോട്‌സ്വാന, സൗത്ത് ആഫ്രിക്ക, ഹോങ്കോംഗ്, ബ്രസീല്‍, ബംഗ്ലാദേശ്, ചൈന, മൗറീഷ്യസ്, ന്യൂസിലാന്റ്, സിംബാംബ്‌വെ , സിംഗപ്പൂര്‍, ഇസ്രായില്‍ തുടങ്ങിയ രാജ്യങ്ങളില്‍ നിന്നെത്തുന്നവര്‍ക്കും ഈ രാജ്യങ്ങളുമായി ബന്ധപ്പെട്ട് യാത്ര ചെയ്തവര്‍ക്കുമാണ് പരിശോധന കര്‍ശനമാക്കിയത്. ഇവിടങ്ങളില്‍ നിന്നുള്ള യാത്രക്കാരുമായി സമ്പര്‍ക്കം വന്നവരിലും നിരീക്ഷണമുണ്ടാകും.
ആദ്യഘട്ടം ഇവരില്‍ ആര്‍ടി പി സി ആര്‍ ടെസ്റ്റ് നടത്തും. തുടര്‍ന്ന് ഇവര്‍ക്ക് ഏഴു ദിവസത്തെ ക്വാറന്റൈന്‍ നിര്‍ദേശിക്കും. എട്ടാം ദിവസം വീണ്ടും ആര്‍.ടി.പി.സി. ആര്‍ ടെസ്റ്റ് നടത്തും. വീണ്ടും പോസിറ്റീവ് ആയാല്‍ ഏഴു ദിവസം കൂടി ക്വാന്റൈന്‍ തുടരേണ്ടി വരും. നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ പരിശോധനകള്‍ക്കുള്ള സൗകര്യം ഏര്‍പ്പെടുത്തി. ഡോ. ഹനീഷ് മീരാസയാണ് നോഡല്‍ ഓഫീസര്‍. എട്ടംഗ ആരോഗ്യ പ്രവര്‍ത്തകരും സംഘത്തിലുണ്ട്. സിയാലുമായി സഹകരിച്ചാണ് പ്രവര്‍ത്തനങ്ങള്‍ നടപ്പാക്കുന്നത്. ആര്‍ടി പി സി ആര്‍ പോസിറ്റീവ് ആകുന്നവരുടെ സാമ്പിളുകള്‍ ഇന്ത്യന്‍ സാര്‍സ് കോവിഡ് 2 ജീനോമിക് കണ്‍സോര്‍ഷ്യത്തിനു കീഴിലെ ജീനോം സീക്വന്‍സിംഗ് ലബോറട്ടറികളില്‍ വിദഗ്ധ പരിശോധനക്കായി അയക്കും.
