ലഖ്നൗ- ഡെപ്യൂട്ടി ബാങ്ക് മാനേജറായ യുവതിയെ വാടകവീട്ടില് തൂങ്ങിമരിച്ച നിലയില് കണ്ടെത്തി. ഉത്തര്പ്രദേശിലെ ഫൈസാബാദില് പഞ്ചാബ് നാഷണല് ബാങ്കില് ജോലിചെയ്തിരുന്ന ലഖ്നൗ രാജാജിപുരം സ്വദേശി ശ്രാദ്ധ ഗുപ്ത(32)യെയാണ് മരിച്ചനിലയില് കണ്ടെത്തിയത്.
ഇവരുടെ വീട്ടില്നിന്ന് കണ്ടെടുത്തിയ ആത്മഹത്യാകുറിപ്പില് രണ്ട് പോലീസുകാരുടെ പേരുകളുണ്ട്. അന്വേഷണം തുടരുകയാണെന്ന് അയോധ്യ സീനിയര് പോലീസ് സൂപ്രണ്ട് ശൈലേഷ് പാണ്ഡെ പറഞ്ഞു. രാവിലെ വീട്ടിലെത്തിയ പാല്ക്കാരനാണ് യുവതിയെ കാണാത്തതിനെ തുടര്ന്ന് മറ്റുള്ളവരെ വിവരമറിയിച്ചത്.
പോലീസ് വീട്ടില് നടത്തിയ പരിശോധനയിലാണ് യുവതിയുടെ ആത്മഹത്യാക്കുറിപ്പ് കണ്ടെടുത്തത്. തന്റെ ആത്മഹത്യയ്ക്ക് കാരണക്കാരായി ഒരു പോലീസ് ഉദ്യോഗസ്ഥന്റെയും കോണ്സ്റ്റബിളിന്റെയും പേരുകളാണ് യുവതി കുറിപ്പില് എഴുതിയിരിക്കുന്നത്. മറ്റുചിലരുടെ പേരുകളും കുറിപ്പിലുണ്ട്. എന്നാല് ഇതുസംബന്ധിച്ച കൂടുതല് വിവരങ്ങള് പോലീസ് പുറത്തുവിട്ടിട്ടില്ല.
2015ലാണ് ശ്രാദ്ധ ഗുപ്ത ബാങ്കില് ജോലിക്ക് ചേര്ന്നത്. പിന്നീട് ഡെപ്യൂട്ടി മാനേജറായി പ്രൊമോഷന് ലഭിക്കുകയായിരുന്നു. 2018 മുതല് ഫൈസാബാദിലാണ് ജോലിചെയ്തുവരുന്നത്. വാടകവീട്ടില് തനിച്ചായിരുന്നു താമസം. ഇടയ്ക്ക് മാത്രമേ ലഖ്നൗവിലെ വീട്ടിലേക്ക് പോകാറുണ്ടായിരുന്നുള്ളൂ.
