തിരുവനന്തപുരം- മണ്ണിടിച്ചില്, ഉരുള്പൊട്ടല് സാധ്യതാ പ്രദേശങ്ങളില്നിന്ന് ജനങ്ങളെ നിര്ബന്ധമായും മാറ്റി പാര്പ്പിക്കണമെന്ന് സര്ക്കാര് നിര്ദേശം നല്കി. നിശ്ചിത അളവിലധികം വെള്ളത്തിലൂടെ വാഹനങ്ങള് കടത്തിവിടരുത്.
കൃഷിനാശം സംബന്ധിച്ച വിശദ വിവരങ്ങള് ജില്ലകളില്നിന്ന് ലഭ്യമാക്കണം. ശബരിമല തുലാമാസ പൂജാ സമയത്തുള്ള തീര്ഥാടനം ഇത്തവണ പൂര്ണമായും ഒഴിവാക്കാന് പ്രളയ അവലോകന യോഗം തീരുമാനിച്ചു. നിലയ്ക്കല്, പെരുന്തേനരുവി മേഖലയില് ഞായറാഴ്ച തന്നെ ഇരുപതു സെന്റീമീറ്ററിലധികം മഴ പെയ്തിരുന്നു. കക്കി ഡാമിന്റെ ഷട്ടറുകള് തുറക്കേണ്ട സാഹചര്യവും വന്നിരിക്കുന്നു. നദികളിലെ ജലനിരപ്പ് ഉയര്ന്നിട്ടുണ്ട്. വനമേഖലയിലെ കനത്ത മഴ ഉരുള്പൊട്ടലിനും മണ്ണിടിച്ചിലിനുമുള്ള സാധ്യതയയും വര്ധിപ്പിക്കുന്നുണ്ട്. ബുധനാഴ്ച മുതല് ശക്തമായ മഴ പ്രവചിക്കപ്പെട്ടിട്ടുമുണ്ട്. ഈ സാഹചര്യത്തില് ഈ ദിവസങ്ങളില് തീര്ഥാടനം അനുവദിക്കാന് കഴിയില്ല എന്ന് യോഗം വിലയിരുത്തി. നേരത്തെ നിലക്കലില് എത്തിയ തീര്ഥാടകരെ സുരക്ഷിതമായി മടക്കി അയയ്ക്കാന് ജില്ലാ ഭരണ സംവിധാനത്തിന് നിര്ദേശം നല്കി.