കൊച്ചി- മുസ്ലിംലീഗ് നേതാവ് പി.കെ.കുഞ്ഞാലിക്കുട്ടിക്കെതിരെ തെളിവുകളുമായി കെ.ടി.ജലീല് എന്ഫോഴ്സ്മെന്റ് ഡയറക്ടറേറ്റ് ഓഫീസിലെത്തി. എ.ആര്.നഗര് സഹകരണ ബാങ്കില് പി.കെ.കുഞ്ഞാലിക്കുട്ടിക്കും മകനും കള്ളപ്പണ നിക്ഷേപമുണ്ടെന്ന ആരോപണവുമായി ബന്ധപ്പെട്ട രേഖകള് ജലീല് ഹാജരാക്കിയെന്നാണ് വിവരം.
രാവിലെ 10.45 ഓടെയാണ് എംഎല്എ ബോര്ഡ് വെച്ച കാറില് കൊച്ചിയിലെ ഇ.ഡി.ഓഫീസിലെത്തിയത്. നേരത്തെ കുഞ്ഞാലിക്കുട്ടിക്കെതിരെ നല്കിയ പരാതിയുടെ അടിസ്ഥാനത്തിലാണ് ഇ.ഡി ജലീലിനെ വിളിപ്പിച്ചത്.
എ ആര് നഗര് സഹകരണ ബാങ്കില് കുഞ്ഞാലിക്കുട്ടിക്ക് 300 കോടി കള്ളപ്പണം ഉണ്ടെന്നാണ് ജലീലിന്റെ ആരോപണം. ബാങ്ക് സെക്രട്ടറി ഹരികുമാര് കുഞ്ഞാലിക്കുട്ടിയുടെ സഹായിയാണെന്നും ജലീല് ആരോപിച്ചിരുന്നു. ചന്ദ്രിക അക്കൗണ്ട് വഴിയും കള്ളപ്പണ ഇടപാട് നടത്തിയെന്നും ജലീല് ആരോപിച്ചിരുന്നു.
