ഫെയ്‌സ് ടൈം കോളുകളിൽ ഷെയർ പ്ലേ, നോട്ടിഫിക്കേഷനുകൾക്ക് പുതിയ ഡിസൈൻ, ശ്രദ്ധ മാറാതിരിക്കാൻ ഫോക്കസ്, സഫാരിയിലും മാപ്‌സിലും മാറ്റം
ഐഫോൺ ഉപയോഗം പുതിയ തലത്തിലെത്തിക്കുമെന്ന പ്രഖ്യാപനത്തോടെ ആപ്പിൾ പുതിയ അപ്‌ഡേറ്റ് പ്രഖ്യാപിച്ചു. ഉപയോക്താക്കൾക്ക് വളരെ പ്രയോജനപ്രദമാകുന്ന ഫീച്ചറുകളാണ് പ്രധാന അപ്‌ഡേറ്റായ ഐഒഎസ് 15 ൽ ഉൾക്കൊള്ളിച്ചിരിക്കുന്നത്.
ഐഒസ് 15 ന്റെ ഡവലപ്പർ പ്രിവ്യൂ ആപ്പിൾ ഡെവലപ്പർ പ്രോഗ്രാം അംഗങ്ങൾക്ക് ലഭ്യമാക്കിയിട്ടുണ്ട്. പബ്ലിക് ബീറ്റാ പതിപ്പ് അടുത്ത മാസത്തോടെ ലഭ്യമാകും.
ഫെയ്‌സ് ടൈം കോളുകൾ ആപ്പിൾ ഉപകരണങ്ങൾക്കപ്പുറത്തേക്ക് വ്യാപിക്കുമെന്നത് പുതിയ അപ്‌ഡേറ്റിൽ പ്രധാന സവിശേഷതയാണ്. ആൻഡ്രോയിഡും വിൻഡോസ് ഉപകരണങ്ങളും ഉപയോഗിക്കുന്ന ആർക്കും അവരുടെ വെബ് ബ്രൗസറിൽനിന്ന് ഫെയ്‌സ്‌ടൈം കോളിൽ ചേരാനാകും.
അറിയിപ്പുകൾ നിയന്ത്രിക്കാനും വിവരങ്ങൾ വേഗത്തിൽ ആക്‌സസ് ചെയ്യുന്നതിൽ ശ്രദ്ധ കേന്ദ്രീകരിക്കാനും സഹായിക്കുന്ന ഫോക്കസും ഷെയർപ്ലേയും ആപ്പിൾ പുതിയ അപ്‌ഡേറ്റിൽ ഉൾപ്പെടുത്തിയിട്ടുണ്ട്.
തത്സമയം അനുഭവങ്ങൾ പങ്കിടുമ്പോൾ കണക്ഷൻ നിലനിർത്താനും ഐ.ഒ.എസ് 15 സഹായിക്കും. ശ്രദ്ധ വ്യതിചലിക്കുന്നത് കുറയ്ക്കുന്നതിനും കേന്ദ്രീകരിക്കുന്നതിനും ഇത് സഹായകമാകും. ഫോട്ടോ അനുഭവം മെച്ചപ്പെടുത്തുന്നതിന് ഇന്റലിജൻസ് ഉപയോഗിക്കുന്നതാണ് മറ്റൊരു സവിശേഷത. ആപ്പിൾ മാപ്‌സിലെ മാറ്റം നാവിഗേഷനിൽ പുതിയ അനുഭവം സമ്മാനിക്കുമെന്നും ആപ്പിൾ സോഫ്റ്റ്‌വെയർ എഞ്ചിനീയറിംഗ് സീനിയർ വൈസ് പ്രസിഡന്റ് ക്രെയ്ഗ് ഫെഡറിഗി പറഞ്ഞു. ആപ്പിൾ മാപ്‌സിൽ കൂടുതൽ അപ്‌ഡേറ്റുകൾ ഉൾപ്പെടുത്തിയിട്ടുണ്ട്.
ഫെയ്‌സ് ടൈം കോളിലെ ശബ്ദം മെച്ചപ്പെടുത്തുന്നതിന് സ്‌പെഷ്യൽ ഓഡിയോ ഉപയോഗിക്കുന്നതോടൊപ്പം പുതിയ മൈക്രോഫോൺ മോഡുകൾ ഉപയോക്താവിന്റെ ശബ്ദത്തെ പശ്ചാത്തല ശബ്ദത്തിൽ നിന്ന് വേർതിരിക്കും.
ഐഫോണിൽ ജനപ്രിയമായ പോർട്രെയിറ്റ് ഫോട്ടോകളിൽ നിന്ന് പ്രചോദനം ഉൾക്കൊണ്ട് പോർട്രെയിറ്റ് മോഡ് ഫെയ്‌സ്‌ടൈമിലും ലഭ്യമാക്കിയിട്ടുണ്ട്. വീഡിയോ കോളുകൾക്കായി പ്രത്യേകമായി രൂപകൽപ്പന ചെയ്തിരിക്കുന്നതിനാൽ ഉപയോക്താക്കൾക്ക് അവരുടെ പശ്ചാത്തലം മങ്ങിക്കാനും ശ്രദ്ധ കേന്ദ്രീകരിക്കാനും കഴിയുമെന്ന് ആപ്പിൾ ഡബ്ല്യുഡബ്ല്യുഡിസി 21 കോൺഫറൻസിൽ അറിയിച്ചു.
ഫെയ്‌സ് ടൈമിലെ സുഹൃത്തുക്കളുമായി സംസാരിക്കുമ്പോൾ ആപ്പിൾ മ്യൂസിക്കിനൊപ്പം പാട്ടുകൾ കേൾക്കുക, ടിവി ഷോയും മൂവികളും സമന്വയിപ്പിക്കുക, അല്ലെങ്കിൽ അപ്ലിക്കേഷനുകൾ ഒരുമിച്ച് കാണുന്നതിന് സ്‌ക്രീൻ ഷെയറിംഗ് എന്നിങ്ങനെ ഉപയോക്താക്കൾക്ക് ഷെയർപ്ലേയിലൂടെ അനുഭവങ്ങൾ പങ്കിടാൻ കഴിയും.
ഐപാഡ്, ഐഫോൺ, മാക് എന്നിവയിൽ ഷെയർപ്ലേ പ്രവർത്തിക്കും. പ്ലേബാക്ക് നിയന്ത്രണങ്ങൾ ആർക്കും ഉപയോഗിക്കുകയും ചെയ്യാം. ഷെയർപ്ലേ ആപ്പിൾ ടിവിയിലേക്കും വ്യാപിപ്പിച്ചിട്ടുണ്ട്.
ഉപയോക്താവ് ശ്രദ്ധ കേന്ദ്രീകരിക്കാൻ ആഗ്രഹിക്കുന്നതിനെ അടിസ്ഥാനമാക്കി അറിയിപ്പുകളും അപ്ലിക്കേഷനുകളും ഫിൽട്ടർ ചെയ്യുന്ന ഫോക്കസ് ഐ.ഒ.എസ് 15 ലെ പ്രധാന സവിശേഷതയാണ്.
ഇഷ്ടാനുസൃത ഫോക്കസ് സൃഷ്ടിച്ചുകൊണ്ടോ നിർദ്ദേശിച്ച ഫോക്കസ് തിരഞ്ഞെടുക്കുന്നതിലൂടെയോ ഉപയോക്താക്കൾക്ക് അവരുടെ ഉപകരണം സജ്ജമാക്കാൻ കഴിയും.
നോട്ടിഫിക്കേഷനുകൾ പുനർരൂപകൽപന ചെയ്തിട്ടുമുണ്ട്. എളുപ്പം തിരിച്ചറിയാവുന്ന വിധത്തിൽ ആളുകൾക്ക് കോൺടാക്റ്റ് ഫോട്ടോകളും അപ്ലിക്കേഷനുകൾക്കായി വലിയ ഐക്കണുകളും ചേർത്തിട്ടുണ്ട്. അറിയിപ്പുകളുടെ സംഗ്രഹം രാവിലെയോ വൈകുന്നേരമോ കൂടുതൽ ഉചിതമായ സമയത്തോ ഡെലിവറി ചെയ്യുന്നതിനുള്ള സംവിധാനവുമുണ്ട്. ഉപയോക്താക്കളെ ഉടൻ നടപടികൾ സ്വീകരിക്കുന്നതിന് ഫോട്ടോയിലെ ലൈവ് ടെക്‌സ്റ്റ് സഹായിക്കുന്നു. ഫോട്ടോകളിൽനിന്ന് ടെക്‌സ്റ്റ് വേർതിരിക്കാൻ ഉപകരണത്തിലെ ഇന്റലിജൻസാണ് സഹായിക്കുന്നത്.
കൈയ്യക്ഷരത്തിലുള്ള ഫാമിലി പാചകക്കുറിപ്പിന്റെ ചിത്രം തിരയാനും കടയുടെ ബോർഡിൽനിന്ന് ഫോൺ നമ്പർ പകർത്തി അതിലേക്ക് വിളിക്കാനും ഇതുവഴി കഴിയും.
ഇന്റർനെറ്റ് ബ്രൗസറായ സഫാരിക്കും പുതിയ രൂപകൽപ്പന നൽകിയിട്ടുണ്ട്. പുതിയ ടാബ് ബാർ ഒതുക്കമുള്ളതാണ്. ഉപയോക്താക്കൾക്ക് ടാബുകൾക്കിടയിൽ എളുപ്പത്തിൽ സൈ്വപ് ചെയ്യാനാകുമെന്നും ആപ്പിൾ അവകാശപ്പെടുന്നു.
നാവിഗേറ്റ് ചെയ്യുന്നതിനുള്ള പുതിയ മാർഗങ്ങളാണ് പുതിയ അപ്‌ഡേറ്റിലൂടെ ആപ്പിൾ മാപ്‌സിൽ ലഭ്യമാക്കുന്നത്. സമീപസ്ഥലങ്ങൾ, വാണിജ്യ കേന്ദ്രങ്ങൾ, കെട്ടിടങ്ങൾ തുടങ്ങി നഗരങ്ങളിൽ ഗണ്യമായി മെച്ചപ്പെടുത്തിയ വിശദാംശങ്ങളാണ് കാത്തിരിക്കുന്നത്. പുതിയ റോഡ് നിറങ്ങളും ലേബലുകളും, ഇഷ്ടാനുസൃതമായി രൂപകൽപ്പന ചെയ്ത ലാൻഡ്മാർക്കുകളും, ചന്ദ്രപ്രകാശമുള്ള പുതിയ രാത്രികാല മോഡും മാപ്‌സിൽ ഉൾപ്പെടുത്തിയിട്ടുണ്ട്.
