ന്യൂദല്ഹി- ദല്ഹിയിലെ സെന്ട്രല് വിസ്ത പദ്ധതിയുടെ നിര്മാണ പ്രവര്ത്തനങ്ങള് സ്റ്റേ ചെയ്യണമെന്ന ഹരജി ദല്ഹി ഹൈക്കോടതി തള്ളി. ഹരജിക്കാര്ക്ക് ഒരുലക്ഷം രൂപ പിഴ വിധിച്ചു.
ചീഫ് ജസ്റ്റിസ് ഡി.എന് പട്ടേലിന്റെ അധ്യക്ഷതയിലുള്ള ബെഞ്ചാണ് ഹരജി തള്ളിയത്. പരാതിക്കാര് പ്രത്യേക ഉദ്ദേശ ലക്ഷ്യത്തോടെയാണ് ഹരജി ഫയല് ചെയ്തതെന്നും കോടതി പറഞ്ഞു.
സെന്ട്രല് വിസ്ത പദ്ധതിയുടെ നിര്മാണ പ്രവര്ത്തനം നടത്തുന്നവര് താമസിക്കുന്നത് നിര്മാണം നടക്കുന്ന ഇടത്തുതന്നെയാണ്. അതിനാല് കോവിഡ് വ്യാപനം ഉണ്ടാകില്ല. ദല്ഹി ദുരന്ത നിവാരണ അതോറിറ്റിയുടെ ഉത്തരവ് പ്രകാരം നിര്മാണ പ്രവര്ത്തനങ്ങള്ക്ക് യാതൊരു തടസവുമില്ലെന്നും കോടതി ചൂണ്ടിക്കാണിച്ചു.
പദ്ധതി ദേശീയ പ്രധാന്യമുള്ള നിര്മാണ പ്രവര്ത്തനമാണെന്നും 2021 നവംബര് 21ന് മുമ്പ് നിര്മാണം പൂര്ത്തിയാക്കേണ്ടതുണ്ടെന്നും കോടതി ചൂണ്ടിക്കാണിച്ചു.
