തൃശൂര്- സ്കൂള് വളപ്പിനകത്ത് കഞ്ചാവു ചെടിയെക്കുറിച്ച് എക്സൈസിനെ വിവരമറിയിച്ച പ്ലസ് വണ് വിദ്യാര്ഥിനിക്ക് അഭിനന്ദനം.
വടക്കാഞ്ചേരി ഗവണ്മെന്റ് ബോയ്സ് ഹയര് സെക്കന്ഡറി സ്കൂള് വളപ്പിലായിരുന്നു കഞ്ചാവ് ചെടി വളര്ന്നത്. കുടിവെള്ള പദ്ധതിയുടെ പമ്പ് ഹൗസിനോട് ചേര്ന്നായിരുന്നു ഇത്. നൂറു സെന്റിമീറ്റര് വലിപ്പമുള്ള ചെടിക്ക് രണ്ടര മാസത്തിന്റെ വളര്ച്ചയുണ്ടെന്ന് എക്സൈസ് ഉദ്യോഗസ്ഥര് പറഞ്ഞു.
വാര്ത്തകളിലെ ദൃശ്യങ്ങളിലും മറ്റും കണ്ടിട്ടുള്ള ചെടി കണ്ടപ്പോള് വിദ്യാര്ഥിനിക്കു സംശയം തോന്നി. വിദ്യാര്ഥിനിയെ എക്സൈസ് ഉദ്യോഗസ്ഥര് അഭിനന്ദിച്ചു. ഈ മേഖലയില് നേരത്തേ കഞ്ചാവു സംഘങ്ങള് വ്യാപകമായിരുന്നു. അവര് ഉപേക്ഷിച്ച കഞ്ചാവില് നിന്ന് വളര്ന്നതാകാം ചെടിയെന്ന് ഉദ്യോഗസ്ഥര് പറഞ്ഞു.
സ്കൂള് വളപ്പിലെ കുറ്റിക്കാട്ടില് ഏതെങ്കിലും സംഘങ്ങള് കഞ്ചാവ് ഒളിപ്പിച്ചപ്പോള് വളര്ന്നതാകാനും സാധ്യതയുണ്ടെന്നാണു നിഗമനം. ഈ മേഖല കേന്ദ്രീകരിച്ച് കഞ്ചാവ് വില്പന നേരത്തേ സജീവമായിരുന്നു.
