ന്യൂദല്‍ഹി-പുതിയ മന്ത്രിസഭയില്‍ നിന്ന് കെ.കെ. ശൈലജയെ ഒഴിവാക്കിയതില്‍ സി.പി.എം ദേശീയ നേതൃത്വത്തിന് അതൃപ്തി. ശൈലജയെ ഒഴിവാക്കിയത് സംബന്ധിച്ച് സംസ്ഥാന നേതൃത്വമാണ് വിശദീകരിക്കേണ്ടതെന്ന് ബൃന്ദ കാരാട്ട് പറഞ്ഞു. സംസ്ഥാന ഘടകമാണ് കെ.കെ. ശൈലജയെ ഒഴിവാക്കിയ തീരുമാനമെടുത്തതെന്നും അതിനാല്‍ തന്നെ കാരണം വിശദീകരിക്കേണ്ട ഉത്തരവാദിത്വം അവര്‍ക്കുണ്ടെന്നും ബൃന്ദ കാരാട്ട് പ്രതികരിച്ചു. കോവിഡ് പ്രതിരോധത്തില്‍ രാജ്യാന്തര തലത്തിലടക്കം ശ്രദ്ധിക്കപ്പെട്ട വ്യക്തിയാണ് കെ.കെ. ശൈലജ. പിണറായി വിജയന്റെ രണ്ടാം മന്ത്രിസഭയില്‍ ശൈലജ ഉണ്ടാകുമെന്നാണ് പ്രതീക്ഷിക്കപ്പെട്ടിരുന്നത്. എന്നാല്‍ അവസാനഘട്ടത്തില്‍ അവരെ ഒഴിവാക്കിയതില്‍ സി.പി.എം. നേതാക്കള്‍ക്ക് അതൃപ്തിയുണ്ട്. ഇക്കാര്യം പല നേതാക്കളേയും വിളിച്ച് ദേശീയ നേതാക്കള്‍ അറിയിച്ചു എന്നാണ് സൂചന.
