ഇസ്‌ലാമാബാദ്- ദിവസവും ആയിരക്കണക്കിന് ആളുകളുടെ ജീവന്‍ കവരുന്ന കോവിഡും കടുത്ത ഓക്‌സിജന്‍ ക്ഷാമവും സൃഷ്ടിച്ച പ്രതിസന്ധിയില്‍ ഇന്ത്യക്കാര്‍ക്ക് ഐക്യദാര്‍ഢ്യം പ്രഖ്യാപിച്ച് അയല്‍രാജ്യമായ പാക്കിസ്ഥാന്‍. പ്രധാനമന്ത്രി ഇംറാന്‍ ഖാന്‍ അടക്കം രാജ്യത്തെ രാഷ്ട്രീയ നേതാക്കള്‍, മാധ്യമപ്രവര്‍ത്തകര്‍, പൊതുജനം തുടങ്ങി എല്ലാവരും ഈ പ്രതിസന്ധി ഘട്ടത്തില്‍ ഇന്ത്യന്‍ ജനതയ്‌ക്കൊപ്പമുണ്ടെന്ന് പ്രഖ്യാപിച്ചിരിക്കുകയാണ്. ഇന്ത്യക്കാര്‍ക്കു വേണ്ടി പ്രാര്‍ത്ഥനകളും നടക്കുന്നുണ്ട്. രണ്ടു ദിവസമായി പാക്കിസ്ഥാനില്‍ ട്വിറ്ററില്‍ #PakistanstandswithIndia, #Indianeedoxygen എന്നീ രണ്ട് ഹാഷ്ടാഗുകളാണ് ഏറ്റവും മുന്നില്‍ ട്രെന്‍ഡ് ചെയ്യുന്നത്.
കോവിഡുമായി പൊരുതുന്ന ഇന്ത്യയിലെ ജനങ്ങള്‍ക്ക് ഐക്യദാര്‍ഢ്യം അറിയിക്കുന്നതായി പ്രധാനമന്ത്രി ഇംറാന്‍ ഖാനും ഇന്ന് ട്വീറ്റ് ചെയ്തു. അയല്‍ രാജ്യത്തും ലോകത്തും ഈ മഹാമാരിയില്‍ അകപ്പെട്ടവര്‍ വേഗത്തില്‍ കരകയറട്ടെ എന്ന് ഞങ്ങള്‍ പ്രാര്‍ത്ഥിക്കുന്നു. മാനവിക നേരിടുന്ന ഈ വെല്ലുവിളിയെ നാം ഒന്നിച്ചു പൊരുതി തോല്‍പ്പിക്കേണ്ടതുണ്ടെന്നും ഇംറാന്‍ പറഞ്ഞു. പാക് വിദേശകാര്യ മന്ത്രി ഷാ മഹ്‌മൂദ് ഖുറേശി, വാര്‍ത്താ മന്ത്രി ഫവാദ് ചൗധരി, മനുഷ്യാവകാശ മന്ത്രി ഷിറീന്‍ മസാരി തുടങ്ങി നിരവധി പേരും ഇന്ത്യന്‍ ജനതയ്ക്ക് ഐക്യദാര്‍ഢ്യം പ്രഖ്യാപിച്ച് രംഗത്തെത്തി.
I want to express our solidarity with the people of India as they battle a dangerous wave of COVID-19. Our prayers for a speedy recovery go to all those suffering from the pandemic in our neighbourhood & the world. We must fight this global challenge confronting humanity together
— Imran Khan (@ImranKhanPTI) April 24, 2021
പാക്കിസ്ഥാനിലെ ഏറ്റവും വലിയ ജീവകാരുണ്യ, സാന്ത്വന പരിചരണ സംഘടനയായ ഈദി ഫൗണ്ടേഷനും ഇന്ത്യന്‍ ജനതയെ സഹായിക്കാന്‍ സന്നദ്ധത അറിയിച്ച് കഴിഞ്ഞ ദിവസം പ്രധാനമന്ത്രി നരേന്ദ്ര മോഡിക്ക് കത്തയച്ചിരുന്നു. ഈ ആരോഗ്യ പ്രതിസന്ധിയെ നേരിടുന്നതിന് സഹായിക്കാന്‍ 50 ആംബുലന്‍സുകളും വളണ്ടിയര്‍മാരുടെ സേവനവും നല്‍കാന്‍ തയാറാണെന്നും ഈദി ഫൗണ്ടേഷന്‍ മേധാവി ഫൈസല്‍ ഈദി മോഡിക്കയച്ച് കത്തില്‍ പറഞ്ഞിരുന്നു. എല്ലാ ചെലവുകളും വഹിച്ചുകൊള്ളാമെന്നും ഈ സഹായം ഒരിക്കലും അസൗകര്യമുണ്ടാക്കില്ലെന്നും കത്തില്‍ സംഘടന വ്യക്തമാക്കിയിരുന്നു. സംഘത്തെ നേരിട്ട് നയിക്കാന്‍ താന്‍ ഒരുക്കമാണെന്നും ഫൈസല്‍ സന്നദ്ധത അറിയിച്ചിരുന്നു.
