കോട്ടയം - കോണ്‍ഗ്രസിന്റെ ശക്തമായ മൂന്നേറ്റത്തിന് കേരളം സാക്ഷ്യം വഹിക്കുമെന്ന് മുന്‍മുഖ്യമന്ത്രി ഉമ്മന്‍ചാണ്ടി. പുതുപ്പള്ളിയില്‍ വോട്ടു രേഖപ്പെടുത്തിയ ശേഷം മാധ്യമങ്ങളോടു സംസാരിക്കുകയായിരുന്നു അദ്ദേഹം. കോണ്‍ഗ്രസ് മുക്ത ഭാരതമെന്ന ബി ജെ പി മുദ്രാവാക്യത്തിന് കേരളം കനത്ത തിരിച്ചടി നല്‍കും. ദേശീയതലത്തില്‍ കോണ്‍ഗ്രസിന് ആവേശം നല്‍കുന്ന ഫലം കേരളത്തില്‍ നിന്നുണ്ടാകുമെന്നും ഉമ്മന്‍ചാണ്ടി പറഞ്ഞു. ശക്തമായ മുന്നേറ്റം ഇന്ത്യയില്‍ കോണ്‍ഗ്രസ് നടത്തും.
ശബരിമല വിഷയത്തില്‍ സര്‍ക്കാറിനെ ജനം വിശ്വസിക്കില്ല. ശബരിമലയില്‍ ശരിയായ നിലപാട് എടുത്ത എന്‍ എസ് എസ് എന്ന സംഘടനയെ പോലും മുഖ്യമന്ത്രി വിമര്‍ശിച്ചു. ഇതിനുള്ള തിരിച്ചടി വോട്ടെടുപ്പിലുണ്ടാകും. മുഖ്യമന്ത്രി ശബരിമലയെക്കുറിച്ച് പറയുന്നത് വിശ്വസിക്കാനാവില്ല. ആചാരങ്ങള്‍ക്ക് എതിരായി സത്യവാങ്മൂലം കൊടുത്തയാളാണ് മുഖ്യമന്ത്രി. ജനങ്ങളെ ഭയന്നാണ് മുഖ്യമന്ത്രി ശബരിമല വിഷയത്തില്‍ യു ടേണ്‍ എടുത്തത്. കേരളത്തിലെ ഒരു വിശ്വാസിയും മുഖ്യമന്ത്രിയുടെ വാക്ക് വിശ്വസിക്കില്ല.
വനിതാ മതിലുണ്ടാക്കി നവോത്ഥാനത്തിന് ശ്രമിച്ചു. തെരഞ്ഞെടുപ്പ് ദിവസം മുഖ്യമന്ത്രിയുടെ നിലപാട് അത്ഭുതപ്പെടുത്തുന്നതാണെന്നം ഉമ്മന്‍ചാണ്ടി പറഞ്ഞു. അയ്യപ്പനും ദേവഗണങ്ങളും ഇന്നലെവരെ ആരുടെ കൂടെ ആയിരുന്നുവെന്ന് ഉമ്മന്‍ ചാണ്ടി ചോദിച്ചു. ശബരിമലയില്‍ സാധ്യമായ എല്ലാ നിയമനടപടികളും യു ഡി എഫ് അധികാരത്തിലെത്തിയാല്‍ നിര്‍വഹിക്കും.
