ആലപ്പുഴ -ഇരട്ടവോട്ടുമായി ബന്ധപ്പെട്ട മുഴുവന് വിവരങ്ങളും നാളെ പുറത്തുവിടുമെന്നും വോട്ടര് പട്ടികയിലെ ക്രമക്കേട് ആരോപണത്തില് ഉറച്ച് നില്ക്കുന്നുവെന്നും പ്രതിപക്ഷ നേതാവ് രമേശ് ചെന്നിത്തല. 38,000 ഇരട്ടവോട്ടുകളെ കണ്ടെത്തിയുള്ളൂ എന്ന് തെരഞ്ഞെടുപ്പ് കമ്മിഷന് പറയുന്നത് അതിശയിപ്പിക്കുന്നതും ഞെട്ടിപ്പിക്കുന്നതുമാണെന്നും അദ്ദേഹം പറഞ്ഞു.
താന് പറയുന്നതാണോ അതോ കമ്മിഷന് പറയുന്നതാണോ ശരിയെന്ന് പൊതുജനങ്ങള് അറിയണം. കേരളത്തിലെ തിരഞ്ഞെടുപ്പിനെ അട്ടിമറിക്കാന് സഹായിക്കുന്ന വിധത്തിലുള്ള ഇരട്ടവോട്ടാണ് ചേര്ത്തിരിക്കുന്നത്. ഇതു നിസ്സാര കാര്യമല്ല. ഈ വ്യാജ വോട്ടര്മാര് ഒരു കാരണവശാലും വോട്ടെടുപ്പിൽ പങ്കെടുക്കാന് പാടില്ലെന്ന് അദ്ദേഹം പറഞ്ഞു..
ആഴക്കടല് മത്സ്യക്കൊള്ളയ്ക്കായി സംസ്ഥാന സര്ക്കാര് ഇ.എം.സി.സിയുമായി 2020 ഫെബ്രുവരി 28-ന് ഒപ്പിട്ട ധാരണാപത്രം ഇതുവരെ റദ്ദാക്കിയിട്ടില്ലെന്നും ചെന്നിത്തല ആരോപിച്ചു.
ഒരു മാസം കഴിഞ്ഞിട്ടും ധാരണാപത്രം റദ്ദാക്കിയിട്ടില്ലെന്നാണ് തനിക്ക് ലഭിച്ച വിവരം. റദ്ദാക്കുമെന്ന് പറയുന്നതേയുള്ളൂ. 400 യന്ത്രവത്കൃത ബോട്ടുകളും യാനങ്ങള് നിര്മിക്കാനുള്ള കേരള ഷിപ്പിങ് ആന്ഡ് ഇന്ലാന്ഡ് കോര്പറേഷനുമായി ഇഎംസിസി ഒപ്പിട്ട ധാരണാപത്രം മാത്രമാണ് റദ്ദാക്കിയിട്ടുള്ളത്. ഇ.എം.സി.സി. സര്ക്കാരുമായി ഒപ്പിട്ട ഒറിജിനല് ധാരണാപത്രം ഇപ്പോഴും നിലനില്ക്കുകയാണ്- ചെന്നിത്തല പറഞ്ഞു.
