തൃശൂർ- തൃശൂരിൽ സുരേഷ്ഗോപിയുടെ സ്ഥാനാർഥിത്വത്തിൽ കള്ളക്കളിയുണ്ടെന്നും കോൺഗ്രസുമായി ധാരണയുണ്ടെന്നും ധനമന്ത്രി ഡോ.തോമസ് ഐസക്ക്. തൃശൂരിൽ ഇടത് സ്ഥാനാർഥി പി.ബാലചന്ദ്രന്റെ തെരഞ്ഞെടുപ്പ് പ്രചാരണ യോഗത്തിൽ സംസാരിക്കുകയായിരുന്നു അദ്ദേഹം. 2019ലെ ലോകസഭാ തെരഞ്ഞെടുപ്പിൽ സുരേഷ്ഗോപി മൽസരിക്കുമ്പോഴുള്ള ആവേശം ഇപ്പോഴില്ലെന്നാണ് ലഭിക്കുന്ന സൂചനകൾ. അത്ര ഓളം ഇപ്പോഴില്ല. അത് ചില കള്ളക്കളികളുണ്ടെന്ന സൂചനയാണ്. ഇടത് പ്രവർത്തകർ കരുതലോടെയിരിക്കണമെന്നും പ്രവർത്തനത്തിൽ കുറവ് വരുത്തരുതെന്നും ഐസക്ക് പറഞ്ഞു. ഇവിടെ ഒരു വർഗീയ ശക്തിയും വേര് പിടിക്കില്ല. ഇത് ഗുരുവിന്റെ നാടാണ്. ഗുരു പറഞ്ഞത് കേൾക്കണോ, സുരേഷ്ഗോപി പറഞ്ഞത് കേൾക്കണോയെന്നത് ജനങ്ങൾക്ക് അറിയാം.
മന്ത്രി വി.എസ്.സുനിൽകുമാർ, സ്ഥാനാർഥി പി.ബാലചന്ദ്രൻ തുടങ്ങിയവരും മന്ത്രിയോടൊപ്പം വിവിധ കേന്ദ്രങ്ങളിൽ പങ്കെടുത്തു . ഒളരി, കേച്ചേരി, ഏങ്ങണ്ടിയൂർ, കുന്നംകുളം എന്നിവിടങ്ങളിലായിരുന്നു ഐസക്കിന്റെ പ്രചാരണം.
