മലപ്പുറം- നിയമസഭ തെരഞ്ഞെടുപ്പിൽ തവനൂർ മണ്ഡലത്തിൽ ജീവകാരുണ്യ പ്രവർത്തകന് ഫിറോസ് കുന്നംപറമ്പിൽ മത്സരിക്കുമെന്ന വാർത്തകൾക്കിടെ, യൂത്ത് കോണ്ഗ്രസില്നിന്ന് പ്രതിഷേധം.
സ്ഥാനാർഥിയെ കെട്ടിയിറക്കരുതെന്ന ആവശ്യമാണ് യൂത്ത്കോൺഗ്രസ് പ്രവർത്തകർ ഉന്നയിക്കുന്നത്. യൂത്ത്കോൺഗ്രസ് മലപ്പുറം ജില്ലാ കമ്മിറ്റി ഇതുസംബന്ധിച്ച പ്രമേയം പാസാക്കി.
തവനൂർ നിയോജക മണ്ഡലത്തിൽ യു.ഡി.എഫ് സ്ഥാനാർഥിയായി യൂത്ത് കോൺഗ്രസ് നേതാക്കളെ പരിഗണിക്കണം. സ്ഥാനാർഥികളെ നൂലിൽ കെട്ടിയിറക്കുന്നത് വിജയ സാധ്യതയെ ബാധിക്കുമെന്ന് പ്രമേയത്തിൽ പറയുന്നു.
എതിരാളി ആരാണെങ്കിലും തവനൂരിൽ നിന്ന് ജനവിധി തേടുമെന്ന് ഫിറോസ് കുന്നംപറമ്പിൽ നേരത്തെ പറഞ്ഞിരുന്നു. മന്ത്രി കെ.ടി ജലീലാണ് മണ്ഡലത്തിലെ എൽ.ഡി.എഫ് സ്ഥാനാർഥി.