ന്യൂദല്ഹി- തമിഴ് ഭാഷ പഠിക്കാനായില്ല എന്നത് തന്റെ ദീര്ഘമായ രാഷ്ട്രീയ ജീവിതത്തില് എക്കാലവും നിലനില്ക്കുന്ന ദുഃഖമാണെന്ന് പ്രധാനമന്ത്രി നരേന്ദ്ര മോഡി. ലോകത്തിലെ ഏറ്റവും പഴക്കമേറിയ ഭാഷയാണ് തമിഴെന്നും തന്റെ പ്രതിമാസ റേഡിയോ പരിപാടിയായ മന് കി ബാത്തില് മോദി പറഞ്ഞു. ഏപ്രില് ആറിന് തമിഴ്നാട്ടില് നിയമസഭാ തിരഞ്ഞെടുപ്പ് നടക്കാനിരിക്കുന്ന സാഹചര്യത്തിലായിരുന്നു പ്രധാനമന്ത്രിയുടെ പരാമര്ശം.
'ലോകത്തിലെ ഏറ്റവും പഴയ ഭാഷയായ തമിഴ് പഠിക്കാനായില്ല എന്നതാണ് ഏറ്റവും വലിയ ദുഃഖം. ലോകമെമ്പാടും ജനപ്രിയമായ മനോഹര ഭാഷയാണ് തമിഴ്. തമിഴ് സാഹിത്യത്തിന്റെ മഹത്വത്തെക്കുറിച്ചും തമിഴ് കവിതയുടെ ആഴത്തെക്കുറിച്ചും നിരവധി പേര് എന്നോട് പറഞ്ഞിട്ടുണ്ട്' പ്രധാനമന്ത്രി പറഞ്ഞു. മുഖ്യമന്ത്രിയും പ്രധാനമന്ത്രിയുമായുള്ള ദീര്ഘകാലത്തെ രാഷ്ട്രീയ ജീവിതത്തില് എന്തെങ്കിലും നേടാനാകാത്തതായി അനുഭവപ്പെട്ടിട്ടുണ്ടോ എന്ന ഒരു ശ്രോതാവിന്റെ ചോദ്യത്തിന് ഉത്തരമായാണ് പ്രധാനമന്ത്രി തമിഴ് ഭാഷയെക്കുറിച്ച് പറഞ്ഞത്.
