കൊച്ചി- ഹെല്ത്ത് ഇന്സ്പെക്ടര് കെട്ടിയിട്ട് പീഡിപ്പിച്ചെന്ന വ്യാജ പരാതി നല്കിയ യുവതിക്കെതിരെ കേസെടുക്കാന് ഹൈക്കോടതി ഉത്തരവ്. സമ്മതത്തോടെയുള്ള ലൈംഗിക ബന്ധമായിരുന്നുവെന്ന് യുവതി പിന്നീട് തിരുത്തിയിരുന്നു.
തിരുവനന്തപുരം വെളളറട സ്വദേശിയുടെ പരാതി വ്യാജമെന്ന ഡി.ജി.പിയുടെ റിപ്പോര്ട്ടിന്റെ അടിസ്ഥാനത്തിലാണ് ഉത്തരവ്. യുവതിയും ഹെല്ത്ത് ഇന്സ്പെക്ടറും ലൈംഗികമായി ബന്ധപ്പെട്ടത് പ്രകാരമാണെന്ന് റിപ്പോര്ട്ടില് പറയുന്നു. യുവതിയുടെ പരാതി ആരോഗ്യപ്രവര്ത്തകരുടെ മനോവീര്യം തകര്ത്തെന്ന് ഹൈക്കോടതി നിരീക്ഷിച്ചു.
ക്വാറന്റീനിലായിരുന്ന യുവതിയെ കോവിഡ് ഇല്ലെന്ന സർട്ടിഫിക്കറ്റ് നൽകാനെന്ന പേരിൽ വീട്ടിൽ വിളിച്ചു വരുത്തി കെട്ടിയിട്ടു പീഡിപ്പിച്ചെന്നായിരുന്നു പരാതി. തുടർന്ന് കൊല്ലം കുളത്തൂപ്പുഴ സാമൂഹികാരോഗ്യ കേന്ദ്രത്തിലെ ജൂനിയർ ഹെൽത്ത് ഇൻസ്പെക്ടർ പ്രദീപ് കുമാറിനെ ആരോഗ്യ വകുപ്പ് പിരിച്ചുവിട്ടിരുന്നു.
77 ദിവസം കസ്റ്റഡിയില് കഴിഞ്ഞ പ്രദീപിന് പരസ്പര സമ്മതപ്രകാരമുള്ള ലൈംഗിക ബന്ധമായിരുന്നുവെന്ന പരാതിക്കാരിയുടെ സത്യവാങ്മൂലത്തിന്റെ അടിസ്ഥാനത്തിലാണ് ഹൈക്കോടതി ജാമ്യം അനുവദിച്ചിരുന്നത്.
ബന്ധുക്കളുടെ പ്രേരണ മൂലമാണു പീഡനക്കേസ് കൊടുത്തതെന്നാണു യുവതിയുടെ സത്യവാങ്മൂലത്തിൽ പറഞ്ഞിരുന്നത്. ഇതു വായിച്ച് അത്ഭുതപ്പെട്ടു പോയെന്നും കോടതി നിരീക്ഷിച്ചിരുന്നു.
