കോഴിക്കോട്- സിപിഎമ്മിനെതിരെ വന്നാൽ കെ.ടി. ജയകൃഷ്ണൻ മാസ്റ്ററുടെ അവസ്ഥയുണ്ടാകുമെന്ന ഡിവൈഎഫ്ഐ നേതാവിന്റെ പ്രസംഗം വിവാദത്തിൽ. ഡിവൈ എഫ് ഐ കോഴിക്കോട് ജില്ലാ കമ്മിറ്റി അംഗം രാഹുൽ രാജിന്റെ ഭീഷണി പ്രസംഗമാണ് പാർട്ടിയെ പ്രതിരോധത്തിലാക്കിയിരിക്കുന്നത്.
എടച്ചേരിയിൽ സി പി എമ്മും യു ഡി എഫും തമ്മിലുള്ള സംഘർഷവുമായി ബന്ധപ്പെട്ട് സി പി എം.സംഘടിപ്പിച്ച പ്രതിഷേധ പരിപാടിയിലായിരുന്നു വിവാദ പ്രസംഗം.
അപവാദ പ്രചാരണവുമായി സി പി എമ്മിനെതിരെ വന്നാൽ ഒരു യൂത്ത് ലീഗുകാരനും, യൂത്ത് കോൺഗ്രസുകാരനും പുറത്തിറങ്ങി നടക്കില്ലെന്നും രാഹുൽ പറഞ്ഞിരുന്നു. ഡി വൈ എഫ് ഐ നാദാപുരം ബ്ലോക്ക് പ്രസിഡന്റ്, യുവജന കമ്മിഷൻ കോഓർഡിനേറ്റർ തുടങ്ങിയ സ്ഥാനങ്ങൾ ഇയാൾ വഹിക്കുന്നുണ്ട്.
