റിയാദ് - അധികൃതരുടെ കണക്കുകൂട്ടലുകള്‍ക്ക് വിരുദ്ധമായാണ് സൗദി അറേബ്യയുടെ തലസ്ഥാനത്ത് കോവിഡ് കേസുകള്‍ വര്‍ധിക്കുന്നത്. കഴിഞ്ഞ ഒരാഴ്ചയായി റിയാദില്‍ കോവിഡ് പോസിറ്റീവ് കേസുകള്‍ 150നു മുകളിലാണ്. രാജ്യത്തെ മറ്റുമേഖലകളില്‍ കേസുകള്‍ കുറയുന്നുണ്ടെങ്കിലും തലസ്ഥാന പ്രവിശ്യയില്‍ പിടിച്ചുകെട്ടാനാവുന്നില്ല. കഴിഞ്ഞ അഞ്ചു ദിവസത്തിനിടെ ഇന്നാണ് അല്‍പമെങ്കിലും പുതിയ കേസുകള്‍ കുറഞ്ഞത്. ആരോഗ്യമന്ത്രലായം തിങ്കളാഴ്ച പുറത്തിറക്കിയ കണക്കില്‍ റിയാദ് മേഖലയില്‍ 154 പുതിയ രോഗികളാണുള്ളത്. 167,161, 168, 176 എന്നിങ്ങനെയാണ് പോയ ദിവസങ്ങളിലെ രോഗ ബാധിതരുടെ കണക്ക്.
തലസ്ഥാനത്ത് ടെസ്റ്റ് കൂടിയതു കൊണ്ടാകാം കൂടുതല്‍ കേസുകളെന്ന് ചൂണ്ടിക്കാണിക്കുന്നുണ്ടെങ്കിലും റിയാദില്‍ അതീവ ജാഗ്രത പുലര്‍ത്തേണ്ട സമയമാണെന്ന് മലയാളി സമൂഹിക പ്രവര്‍ത്തകര്‍ ചൂണ്ടിക്കാണിക്കുന്നു. ടെസ്റ്റ് ചെയ്യാതെയും ഡോക്ടറെ കാണാതെയും മലയാളികളായ നിരവധി പേര്‍ റിയാദില്‍ കഴിയുന്നുണ്ടെന്ന് അവര്‍ പറയുന്നു. പനിയും തലവേദനയും കുറയാനുള്ള മരുന്നും മറ്റു നാടന്‍ പ്രയോഗങ്ങളും നടത്തിയാണ് ഇവര്‍ കോവിഡിനെ നേരിടുന്നത്. ആശുപത്രികളില്‍ പോകാതെ തന്നെ കോവിഡ് അതിജീവിക്കുന്നവര്‍ ധാരാളമുണ്ട്.
ഇരുപത്തിനാലു മണിക്കൂറിനിടെ റിയാദില്‍ 114 വ്യാപാര സ്ഥാപനങ്ങള്‍ നഗരസഭ അടപ്പിച്ചു. മുന്‍കരുതല്‍, പ്രതിരോധ നടപടികള്‍ പാലിക്കുന്നുണ്ടെന്ന് ഉറപ്പുവരുത്താന്‍ കഴിഞ്ഞി ദിവസം 4,971 വ്യാപാര സ്ഥാപനങ്ങളിലാണ് റിയാദ് നഗരസഭാ സംഘങ്ങള്‍ പരിശോധനകള്‍ നടത്തിയത്. ഇതിനിടെ 617 നിയമ ലംഘനങ്ങള്‍ കണ്ടെത്തി. ഈ സ്ഥാപനങ്ങള്‍ക്ക് പിഴകള്‍ ചുമത്തിയതായും നഗരസഭ അറിയിച്ചു.
