ടെക്‌സസ്-കോവിഡ് കാലത്തു കോടതി നടപടികള്‍ ഓണ്‍ലൈന്‍ വഴിയാണ്. ഓണ്‍ലൈന്‍ വിചാരണയ്ക്കിടെ വനിതാ ജഡ്ജിയുടെ സൗന്ദര്യത്തില്‍ മയങ്ങി പ്രതി നടത്തിയ പ്രണയാഭ്യര്‍ത്ഥനയാണ് ഇപ്പോള്‍ വാര്‍ത്തയായിരിക്കുന്നത്. കവര്‍ച്ചാശ്രമത്തിന് പിടിയിലായ പ്രതി ഓണ്‍ലൈനിലൂടെയുള്ള വിചാരണയ്ക്കിടെ വനിതാ ജഡ്ജിയോട് പ്രണയാഭ്യര്‍ത്ഥന നടത്തി ഏവരെയും ഞെട്ടിക്കുകയായിരുന്നു. ഫ്‌ളോറിഡയില്‍ നിന്നുള്ള ഈ വിചാരണയുടെ വീഡിയോ സോഷ്യല്‍മീഡിയയില്‍ വൈറലായി. കവര്‍ച്ചാശ്രമത്തിന് അറസ്റ്റ് ചെയ്ത ഡിമിത്രിയസ് ലെവിസ് എന്നയാളെ കോടതിക്ക് മുമ്പാകെ ഹാജരാക്കിയപ്പോഴാണ് രസകരമായ സംഭവം. ബ്രോവാര്‍ജ് കൗണ്ടി ജഡ്ജായ തബിത ബ്ലാക്‌മോന്റെ മുന്നിലാണ് ഇയാളെ വിചാരണയ്ക്കായി എത്തിച്ചത്. സൂം ആപ്പ് വഴിയാണ് വിചാരണ നടത്തിയത്. ഇയാള്‍ ഒരു വീട്ടിനുള്ളില്‍ കയറി കവര്‍ച്ച നടത്താന്‍ ശ്രമിച്ചെന്നാണ് കേസ്. വാദപ്രതിവാദങ്ങളെല്ലാം കേട്ട് ജഡ്ജി തബിത വിധി പ്രസ്താവിച്ചുകൊണ്ടിരിക്കെയാണ് ലെവിസ് പ്രണയാഭ്യര്‍ഥന നടത്തിയത്.
'ജഡ്ജ്, നിങ്ങള്‍ വളരെയധികം സുന്ദരിയാണ്. എനിക്ക് നിങ്ങളോട് പറയാനുള്ളത് ഇതാണ്; 'ഐ ലവ് യൂ, ഐ ലവ് യൂ.' പക്ഷെ പ്രതിയുടെ പ്രണയാഭ്യാര്‍ത്ഥനയൊന്നും ചെവിക്കൊള്ളാതെ ചെറുതായൊന്ന് പുഞ്ചിരിച്ച് അതിനെ തള്ളിക്കളഞ്ഞ തബിത 'മുഖസ്തുതി നിങ്ങളെ പലയിടത്തും എത്തിക്കും, പക്ഷേ ഇവിടെ നടപ്പാകില്ല' എന്ന് പ്രതിയെ ഓര്‍മ്മിപ്പിക്കാനും മറന്നില്ല. കേസില്‍ 5000 രൂപ ബോണ്ട് കെട്ടിവയ്ക്കാന്‍ ലെവിസിന് ശിക്ഷയും വിധിച്ചിരിക്കുകയാണ്. നേരത്തെയും നിരവധി മോഷണക്കേസില്‍ പിടിയിലായ ലെവിസ് 4 വര്‍ഷം തടവുശിക്ഷയും അനുഭവിച്ചിട്ടുണ്ട്.
