തിരുവനന്തപുരം- കൊല്ലം കല്ലുവാതുക്കലില് ഉപേക്ഷിക്കപ്പെട്ട നിലയില് കണ്ടെത്തിയ നവജാതശിശു മരിച്ചു. അണുബാധയെ തുടര്ന്ന് തിരുവനന്തപുരം എസ്.എ.ടി. ആശുപത്രിയിലാണ് മരണം.
ഊഴായിക്കോട് ക്ഷേത്രത്തിനു സമീപത്തെ വീട്ടുപറമ്പിലെ കരിയിലക്കൂട്ടത്തിലാണ് രണ്ടുദിവസം മാത്രം പ്രായമുള്ള ആണ്കുഞ്ഞിനെ കണ്ടെത്തിയത്. പൊക്കിള്കൊടി പോലും മുറിച്ചു മാറ്റാതെ ആയിരുന്നു കുഞ്ഞിനെ ഉപേക്ഷിച്ചത്.
പ്രദേശവാസികളാണ് കുഞ്ഞിനെ കണ്ടെത്തിയ കുഞ്ഞിന് മൂന്നു കിലോ ഭാരമുണ്ടായിരുന്നു. കുഞ്ഞിനെ പോലീസ് ഏറ്റെടുത്താണ് പാരിപ്പള്ളി മെഡിക്കല് കോളേജിലെത്തിച്ചത്. കുഞ്ഞിന് ശ്വാസതടസ്സം ഉണ്ടായിരുന്നതിനെ തുടര്ന്ന് ഐ.സി.യുവില് പ്രവേശിപ്പിച്ചു.
ഇവിടെ വെച്ച് ആരോഗ്യനില മോശമായതിനെ തുടര്ന്നാണ് തിരുവനന്തപുരം എസ്.എ.ടി. ആശുപത്രിയിലേക്ക് മാറ്റിയത്.
സംഭവത്തില് പോലീസ് കേസെടുത്ത് അന്വേഷണം നടത്തി വരികയാണ്.
