റിയാദ്- പരിവര്‍ത്തനം ചെയ്ത പുതിയ കോവിഡ് വൈറസ് വ്യാപന ഭീതിയെ തുടര്‍ന്ന് സൗദി അറേബ്യ ഇന്നലെ അര്‍ധരാത്രി മുതല്‍ അന്താരാഷ്ട്ര വിമാന സര്‍വീസ് നിര്‍ത്തിവെച്ചതോടെ ഇന്ത്യയിലേക്കുള്ള ഇന്നത്തെ ചാര്‍ട്ടേഡ്, വന്ദേഭാരത് വിമാനസര്‍വീസുകള്‍ റദ്ദാക്കി. ഷെഡ്യൂള്‍ ചെയ്ത് സൗദിയില്‍ രാത്രിയും രാവിലെയുമായി എത്തിയ വിമാനങ്ങള്‍ യാത്രക്കാരുമായി തിരിച്ചുപോയി. എല്ലാ പൊതു യാത്രാ സര്‍വീസ് വിമാനങ്ങളും അടുത്ത അറിയിപ്പ് വരെ സൗദിയില്‍ ലാന്റ് ചെയ്യാന്‍ അനുവദിക്കില്ലെന്ന് ബന്ധപ്പെട്ടവര്‍ അറിയിച്ചു.
റിയാദില്‍ നിന്ന് ചെന്നൈയിലേക്കുള്ള സൗദി എയര്‍ലൈന്‍സും ഡല്‍ഹി- ലക്‌നോയിലേക്കുള്ള ഗോ എയറും തിരുവനന്തപുരത്തേക്കുള്ള സ്‌പേസ് ജറ്റും റദ്ദാക്കിയവയില്‍ പെടും. എന്നാല്‍ വന്ദേഭാരത് വിമാനങ്ങള്‍ ഇന്ന് സര്‍വീസ് നടത്തുന്നില്ല. അടുത്ത ദിവസങ്ങളിലെ സര്‍വീസ് ബന്ധപ്പെട്ടവരുമായി ആലോചിച്ച ശേഷം തീരുമാനിക്കുമെന്ന് എയര്‍ ഇന്ത്യ ഉദ്യോഗസ്ഥര്‍ മലയാളം ന്യൂസിനോട് പറഞ്ഞു. സൗദിയിലേക്കുള്ള മറ്റു വിദേശവിമാന കമ്പനികളെല്ലാം സര്‍വീസ് റദ്ദാക്കിയിട്ടുണ്ട്. പല കമ്പനികള്‍ക്കും കഴിഞ്ഞ ദിവസങ്ങളിലാണ് ഷെഡ്യൂള്‍ ലഭിച്ചിരുന്നത്.
