കൊച്ചി- ഷോപ്പിംഗ് മാളില്‍ വെച്ച് രണ്ട് പുരുഷന്‍മാര്‍ മോശമായി പെരുമാറിയെന്ന യുവനടിയുടെ വെളിപ്പെടുത്തല്‍ സോഷ്യല്‍ മീഡിയയില്‍ സജീവ ചര്‍ച്ചയായി. ആ രണ്ട് പുരുഷന്‍മാരെപോലെയാകരുത് നിങ്ങളെന്ന് ഞാന്‍ ആഗ്രഹിക്കുകയും പ്രാര്‍ഥിക്കുകയും ചെയ്യുന്നുവെന്ന് യുവനടി തന്റെ ഇന്‍സ്റ്റഗ്രാം കുറിപ്പില്‍ പറയുന്നു.
മോശമായ അനുഭവം ആദ്യമായല്ലെന്നും ഓരോ തവണയും പ്രയാസമേറിയതും വ്യത്യസ്തവുമായ അനുഭവമാണ് സ്ത്രീയെന്ന നിലയില്‍ പൊതു സമൂഹത്തില്‍ നിന്നുണ്ടാകുന്നതെന്നും നടി പറയുന്നു.
മാളിലെ സി.സി.ടി.വി ദൃശ്യങ്ങള്‍ പരിശോധിച്ച് പ്രതികളെ പോലീസ് തിരിച്ചറിഞ്ഞിട്ടുണ്ട്.
നടിയുടെ പോസ്റ്റ് വായിക്കാം
സോഷ്യല്‍ മീഡിയയില്‍ എപ്പോഴും ഇടപെടുന്നയാളല്ല ഞാന്‍. എന്നാല്‍, ഇന്ന് സംഭവിച്ചത് കണ്ടില്ലെന്ന് നടിക്കാനാവില്ല.
ലുലു ഹൈപ്പര്‍മാര്‍ക്കറ്റില്‍ വെച്ച് ആളുകള്‍ തിങ്ങിനിറഞ്ഞ ഇടനാഴിയില്‍ വെച്ച് രണ്ടുപേര്‍ എന്നെ മറികടന്ന് നടന്നു. അതില്‍ ഒരാള്‍ പോകുന്നതിനിടെ എന്റെ ദേഹത്ത് സ്പര്‍ശിച്ചു. എന്നാല്‍, ഉടനടി എനിക്ക്പ്രതികരിക്കാന്‍ കഴിഞ്ഞില്ല. സംശയത്തിന്റെ ആനുകൂല്യം നല്‍കാമെന്ന് കരുതിയെങ്കിലും ശരിയല്ലാത്ത ഒരുകാര്യം നടന്നാല്‍ നമുക്കത് ബോധ്യപ്പെടും.
അധികം ദൂരെയല്ലാതെ നിന്നിരുന്ന എന്റെ സഹോദരി ഇത് വളരെ വ്യക്തമായി കണ്ടു. അവള്‍ എന്റെ അടുത്ത് വന്ന് വിഷയം തിരക്കി. ഞാന്‍ പകച്ചു നില്‍ക്കുകയായിരുന്നു. ഞാന്‍ സങ്കല്‍പിക്കുക പോലും ചെയ്യാത്ത കാര്യമാണ് നടന്നതെന്ന് അവള്‍ക്ക് മനസ്സിലായി. ഏതാനും സമയം എന്തുചെയ്യണമെന്നറിയാത്ത സ്ഥിതിയിലായിരുന്നു ഞാന്‍.
പിന്നീട് അവര്‍ നില്‍ക്കുന്ന ഭാഗത്തേക്ക് പോയപ്പോള്‍ എന്നെ ശ്രദ്ധിക്കാത്തത് പോലെ നിന്നു. എനിക്ക് മനസ്സിലായെന്ന് തിരിച്ചറിഞ്ഞതോടെ ഇരുവരും അവിടെ നിന്ന് സ്ഥലം കാലിയാക്കി.
ആ സമയത്ത് എനിക്ക് ഒന്നും പ്രതികരിക്കാന്‍ കഴിയാത്തത് ഓര്‍ത്ത് എനിക്ക് ദേഷ്യം വന്നു. എന്ത് പറയണമെന്ന് ആലോചിക്കാന്‍ പോലും എനിക്ക് അപ്പോള്‍ കഴിഞ്ഞിരുന്നില്ല.
പിന്നീട് ഞങ്ങള്‍ രണ്ടുപേരും അമ്മയും സഹോദരനും നില്‍ക്കുകയായിരുന്ന പച്ചക്കറി കൗണ്ടറിലേക്ക് പോയി. ഈ സമയം നേരത്തെ ശല്യം ചെയ്ത രണ്ടുപേരും ഞങ്ങളെ പിന്തുടര്‍ന്നു. അമ്മയും സഹോദരനും സാധനങ്ങള്‍ എടുക്കുന്ന തിരക്കിലായതിനാല്‍ ഞാനും സഹോദരിയും ബില്ലിങ് കൗണ്ടറിലേക്ക് പോയി. ഇരുവരും അവിടെയും എത്തി. ഈ സമയം അയാള്‍ എന്നോടും സഹോദരിയോടും സംസാരിക്കാന്‍ മുതിര്‍ന്നു. കൂടുതല്‍ അടുക്കാനുള്ള ശ്രമത്തിലായിരുന്നു അയാള്‍. ഞാന്‍ അഭിനയിച്ച സിനിമകളുടെ പേരുകള്‍ അയാള്‍ ചോദിച്ചു. താന്‍ തന്റെ കാര്യം നോക്കി പോകാന്‍ പറഞ്ഞു. അമ്മ ഞങ്ങളുടെ അടുത്തേക്ക് വരുന്നത് കണ്ടതോടെ അവര്‍ സ്ഥലം വിട്ടു.
ആ സമയത്ത് എനിക്ക് അവരോട് പറയാമായിരുന്ന ആയിരം കാര്യങ്ങളെക്കുറിച്ചും ചെയ്യാമായിരുന്ന നൂറു കാര്യങ്ങളെക്കുറിച്ചും ഇത് ടൈപ്പുചെയ്യുമ്പോള്‍ എന്റെ മനസ്സില്‍ തെളിയുന്നുണ്ട്. പക്ഷെ, എനിക്ക് ആ സമയത്ത് ഒന്നിനും കഴിഞ്ഞില്ല.
അല്‍പം ആശ്വാസം കിട്ടാനാണ് ഞാനിത് തുറന്നു പറയുന്നത്. അല്‍പം പോലും കുറ്റബോധമില്ലാതെയാണ് അവര്‍ അവിടെ നിന്ന് പോയത്. അവരത് ഇനിയും ആവര്‍ത്തിക്കുമെന്നുറപ്പാണ്. അതെന്നെ ചൊടിപ്പിക്കുന്നുണ്ട്. ഇതെന്റെ ആദ്യത്തെ അനുഭവമല്ല. പക്ഷേ, ഓരോ തവണയും അനുഭവം വ്യത്യസ്തവും പ്രയാസമേറിയതും ആകുകയാണ്.
വീട്ടില്‍ നിന്ന് പുറത്തിറങ്ങുമ്പോഴൊക്കെ ഒരു സ്ത്രീ എന്തൊക്കെ ശ്രദ്ധിക്കണം... തിരിയുമ്പോഴും മറിയുമ്പോഴും വസ്ത്രത്തിന് എന്തൊക്കെ സംഭവിക്കുന്നുവെന്ന് നോക്കണം, ആള്‍ക്കൂട്ടത്തിലാകുമ്പോഴൊക്ക മാറിടം കൈകള്‍ കൊണ്ട് ചുറ്റി സംരക്ഷിക്കണം... ഈ പട്ടിക ഇനിയും നീളും. ഓരോ മിനിറ്റും ജാഗ്രതയോടെ ഇരിക്കണമെന്നത് മടുപ്പിക്കുന്നതാണ്. വീട്ടിലിരിക്കുമ്പോഴും, പുറത്തുള്ള അമ്മയെയും സഹോദരികളെയും കൂട്ടുകാരികളെയും കുറിച്ചാലോചിച്ച് ഇതേ ആവലാതികള്‍ പിന്തുടരും.
ഇതെല്ലാം രോഗാതുരരായ പുരുഷന്‍മാരെ കൊണ്ട് സംഭവിക്കുന്നതാണ്. ഞങ്ങളുടെ സുരക്ഷിതത്വവും സമാധാനവും പെണ്ണായിരിക്കുക എന്നതിന്റെ ആനന്ദവുമാണ് നിങ്ങള്‍ കവര്‍ന്നെടുത്തത്. എനിക്ക് നിങ്ങളോട് പുച്ഛമാണ്.
ഇത് വായിക്കുന്ന പുരുഷന്‍മാരോട്: നിങ്ങള്‍ എപ്പോഴെങ്കിലും സ്ത്രീകളോട് ഇങ്ങനെ പെരുമാറിയിട്ടുണ്ടെങ്കില്‍ ഏറ്റവും നിന്ദ്യമായ ജീവിതാവസ്ഥയിലാണ് നിങ്ങള്‍. നരകമല്ലാതെ മറ്റൊന്നും നിങ്ങള്‍ അര്‍ഹിക്കുന്നില്ല.
ആ രണ്ട് പുരുഷന്‍മാരെപോലെയാകരുത് നിങ്ങളെന്ന് ഞാന്‍ ആഗ്രഹിക്കുകയും പ്രാര്‍ഥിക്കുകയും ചെയ്യുന്നു.
ഇത് വായിക്കുന്ന സ്ത്രീകളോട്: നിന്ദ്യമായി പെരുമാറുന്നവരുടെ മുഖമടക്കി അടിക്കാനുള്ള ധൈര്യം എനിക്കുണ്ടായില്ല. നിങ്ങള്‍ക്കത് ഉണ്ടാകുമെന്ന് ഞാന്‍ പ്രതീക്ഷിക്കുന്നു.
