തിരുവനന്തപുരം- തദ്ദേശ സ്ഥാപനങ്ങളിലേക്കു നടക്കുന്ന തെരഞ്ഞെടുപ്പിന്റെ ആദ്യ ഘട്ടത്തില്‍ അഞ്ചു ജില്ലകളില്‍ പോളിങ് തുടങ്ങി. തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളില്‍ ഏഴു മുതല്‍ വോട്ടെടുപ്പ് ആരംഭിച്ചു. വൈകീട്ട് ആറു വരെയാണ് പോളിങ്. കോവിഡ് മുന്‍കരുതലിന്റെ ഭാഗമായി നിയന്ത്രണങ്ങളോടെയാണ് ഇത്തവണ വോട്ടെടുപ്പ്.
അഞ്ചു ജില്ലകളിലെ 395 തദ്ദേശ സ്ഥാപനങ്ങളിലെ 6,911 വാര്‍ഡുകളിലാണ് ഇന്ന് തെരഞ്ഞെടുപ്പ് നടക്കുന്നത്. 24,584 സ്ഥാനാര്‍ത്ഥികളാണ് ജനവിധി തേടുന്നത്. കൊല്ലം, ആലപ്പുഴ ജില്ലകളില്‍ മൂന്നു സ്ഥാനാര്‍ത്ഥികല്‍ മരിച്ചതിനെ തുടര്‍ന്ന് മൂന്നു വാര്‍ഡുകളില്‍ വോട്ടെടുപ്പ് മാറ്റി.
വ്യാഴാഴ്ചയാണ് രണ്ടാം ഘട്ട പോളിങ്. കോട്ടയം, എറണാകുളം, തൃശ്ശൂര്‍, പാലക്കാട്, വയനാട് ജില്ലകളിലാണ് രണ്ടാം ഘട്ടം വിധിയെഴുത്ത് നടക്കുന്നത്. ഇവിടങ്ങളില്‍ പരസ്യപ്രചാരണം ഇന്ന് വൈകീട്ട് ആറിന് സമാപിക്കും. ഡിസംബര്‍ 14ന് ബാക്കിയുള്ള ജില്ലകളില്‍ അവസാന ഘട്ട വോട്ടെടുപ്പും നടക്കും.
