റിയാദ് - ഗൾഫ് തർക്കം പരിഹരിക്കുന്നതിനുള്ള അന്തിമ കരാറിലെത്തി ചരിത്രപരമായ നേട്ടം കൈവരിക്കുന്ന മാർഗത്തിൽ സൗദി അറേബ്യ നടത്തിയ ശ്രമങ്ങൾക്ക് തിരുഗേഹങ്ങളുടെ സേവകൻ സൽമാൻ രാജാവിന് കുവൈത്ത് അമീർ ശൈഖ് നവാഫ് അൽഅഹ്മദ് അൽജാബിർ അൽസ്വബാഹ് നന്ദിയും അഭിനന്ദനവും അറിയിച്ചു. യു.എ.ഇ, ബഹ്‌റൈൻ, ഈജിപ്ത് എന്നീ രാജ്യങ്ങളെ സൗദി അറേബ്യ പ്രതിനിധീകരിക്കുന്നത് സൗദി അറേബ്യയുടെ അഭിമാനകരമായ സ്ഥാനവും മേഖലയിൽ സുരക്ഷാ ഭദ്രതയുണ്ടാക്കുന്നതിന് നടത്തുന്ന ശ്രമങ്ങളിൽ വഹിക്കുന്ന മുൻനിര പങ്കും മേഖലയും ലോകവും കടന്നുപോകുന്ന നിലവിലെ സാഹചര്യങ്ങളുടെ പശ്ചാത്തലത്തിൽ ഐക്യത്തിലും ഐക്യദാർഢ്യത്തിലുമുള്ള സൗദി അറേബ്യയുടെ താൽപര്യവുമാണ് പ്രതിഫലിപ്പിക്കുന്നതെന്ന് സൽമാൻ രാജാവിന് അയച്ച സന്ദേശത്തിൽ കുവൈത്ത് അമീർ പറഞ്ഞു.
