Sorry, you need to enable JavaScript to visit this website.
Friday , January   15, 2021
Friday , January   15, 2021

പ്രായപൂര്‍ത്തിയായ വനിത ഇഷ്ടമുള്ള  ആളിനൊപ്പം ഇഷ്ടമുള്ളിടത്ത് കഴിയട്ടെ

ന്യൂദല്‍ഹി-കാമുകനെ വിവാഹം കഴിക്കാന്‍ വീട് ഉപേക്ഷിച്ച പ്രായപൂര്‍ത്തിയായ ഒരു സ്ത്രീക്ക് അനുകൂല വിധിയുമായി ദല്‍ഹി ഹൈക്കോടതി. സ്ത്രീയുടെ സമ്മതവും ആഗ്രഹങ്ങളും കണക്കിലെടുത്ത്, ഒരു മുതിര്‍ന്ന വ്യക്തി എന്നനിലയില്‍ അവള്‍ക്ക് ആഗ്രഹിക്കുന്നിടത്തും അവള്‍ ആഗ്രഹിക്കുന്ന ആരുമായും താമസിക്കാന്‍ സ്വാതന്ത്ര്യമുണ്ടെന്നു കോടതി പറഞ്ഞു.കോടതിയില്‍ ഹാജരാക്കണമെന്ന് ആവശ്യപ്പെട്ട് യുവതിയുടെ കുടുംബാംഗങ്ങള്‍ സമര്‍പ്പിച്ച ഹേബിയസ് കോര്‍പ്പസ് ഹര്‍ജിയിലാണ് കോടതി ഉത്തരവ്. ഹര്‍ജി പ്രകാരം സെപ്തംബര്‍ 12 ന് സ്ത്രീയെ കാണാതായി. മാതാപിതാക്കളുടെ വീട്ടില്‍ നിന്ന് കാണാതായതിന് ബബ്ലൂ എന്ന വ്യക്തിയെ സംശയിക്കുന്നതായാണ് പരാതിയില്‍ പറഞ്ഞിരുന്നത്.
വീഡിയോ കോണ്‍ഫറന്‍സിംഗിലൂടെ യുവതിയെ കോടതിയില്‍ ഹാജരാക്കി. ക്രിമിനല്‍ പ്രൊസീജ്യര്‍ കോഡിലെ സെക്ഷന്‍ 164 പ്രകാരം നടത്തിയ പ്രസ്താവനയില്‍, താന്‍ സ്വന്തം ഇച്ഛാസ്വാതന്ത്ര്യവും ഉടമ്പടിയും അനുസരിച്ചാണ് ബബ്ലൂവിനൊപ്പം പോയതെന്നും അയാളെ വിവാഹം കഴിച്ചുവെന്നും വ്യക്തമാക്കി. ഈ നിരീക്ഷണങ്ങളുടെ വെളിച്ചത്തില്‍, ബബ്ലൂവിനൊപ്പം താമസിക്കാന്‍ സ്ത്രീക്ക് കോടതി നിര്‍ദേശം നല്‍കി. അവളെ ബബ്ലൂവിന്റെ വസതിയിലേക്ക് കൊണ്ടുപോകാന്‍ ഞങ്ങള്‍ പോലീസ് അധികാരികളോട് നിര്‍ദേശിക്കുന്നു. നിയമം കൈയിലെടുക്കരുതെന്നും സ്ത്രീയെയോ ബബ്ലൂവിനെയോ ഭീഷണിപ്പെടുത്തരുതെന്നും പോലീസ് അധികാരികള്‍ ഹര്‍ജിക്കാരോടും മാതാപിതാക്കളോടും ഉപദേശിക്കണം. സ്ത്രീ ബബ്ലൂവിനൊപ്പം താമസിക്കുന്ന ഇടത്തെ പോലീസ് സ്‌റ്റേഷനിലെ ബീറ്റ് കോണ്‍സ്റ്റബിളിന്റെ മൊബൈല്‍ നമ്പര്‍ യുവതിയ്ക്കും ബബ്ലൂവിനും നല്‍കണം, അങ്ങനെ ആവശ്യമെങ്കില്‍ പോലീസ് ഉദ്യോഗസ്ഥരുമായി ബന്ധപ്പെടാന്‍ കഴിയും' എന്ന് കോടതി നിര്‍ദേശിച്ചു.