ശ്രീനഗർ- ജീവകാരുണ്യ സഹായം കശ്മീർ തീവ്രവാദികള്‍ക്ക് വകമാറ്റുന്നുവെന്ന കേസില്‍ കശ്മീരില്‍ പത്ത് കേന്ദ്രങ്ങളിലും ബംഗളൂരുവില്‍ ഒരു കേന്ദ്രത്തിലും ദേശീയ അന്വേഷണ ഏജന്‍സി (എന്‍.ഐ.എ) റെയ്ഡ് നടത്തി.
ജമ്മു-കശ്മീരിലെ പ്രമുഖ ഇംഗ്ലീഷ് പത്രമായ ഗ്രേറ്റർ കശ്മീരിന്‍റെ ശ്രീനഗർ ഓഫിസിലും പരിശോധന നടത്തി.
സന്നദ്ധ സംഘടനകളുടെ ഓഫിസുകളും മുതിർന്ന മാധ്യമപ്രവർത്തക‍െൻറയും ഓഫീസുകളും റെയ്ഡ് നടത്തിയവയില്‍ ഉള്‍പ്പെടും.
ജെ ആൻഡ് കെ സിവിൽ സൊസൈറ്റി കോഓർഡിനേറ്റർ ഖുർറം പർവേസ്, സഹപ്രവർത്തകരായ പർവേസ് അഹ്മദ് ബുഖാരി, പർവേസ് അഹ് മദ് മട്ട, ബംഗളൂരുവിലെ സ്വാതി ശേഷാദ്രി, കശ്മീരില്‍ കാണാതായവരുടെ മാതാപിതാക്കളുടെ കൂട്ടായ്മയുടെ ചെയർപേഴ്സൻ പർവീന ആഹംഗർ തുടങ്ങിയവരുടെ ഓഫിസുകളിലും അത്രൗട്ട്, ജി.കെ. ട്രസ്റ്റ് എന്നീ സംഘടനകളുടെ ഓഫിസിലുമാണ് റെയ്ഡ് നടന്നത്. നിരവധി രേഖകളും ഇലക്ട്രോണിക് ഉപകരണങ്ങളും പിടിച്ചെടുത്തതായി എൻ.ഐ.എ വക്താവ് പറഞ്ഞു.
