ന്യൂദല്‍ഹി- ഇന്ത്യയിലെ കോവിഡ് ബാധിച്ചുള്ള മരണങ്ങളില്‍ 17 ശതമാനത്തോളം പേരുടേയും മരണത്തിന് വായു മലിനീകരണവുമായി ബന്ധമുണ്ടെന്ന് പഠനം. ലോകത്തൊട്ടാകെ ശരാശരി 15 ശതമാനമാണിത്. ദീര്‍ഘ കാലം മലിന വായു ശ്വസിച്ചതാണ് ഇന്ത്യയില്‍ മരണം കൂടാന്‍ കാരണമെന്നും ഗവേഷണ ജേണലായ കാര്‍ഡിയോവാസ്‌കുലര്‍ റിസര്‍ചില്‍ പ്രസിദ്ധീകരിച്ച പഠനം പറയുന്നു.
ജൂണ്‍ മൂന്നാം വാരം വരെയുള്ള മരണ കണക്കുകളാണ് പഠന വിധേയമാക്കിയത്. വായു ഗുണനിലവാര ഡേറ്റയും ലോകത്തൊട്ടാകെയുള്ള കോവിഡ് മരണ നിരക്കും വിശകലനം ചെയ്ത് ഇവയില്‍ വായുമലിനീകരണവുമായി ബന്ധമുള്ള കോവിഡ് മരണങ്ങളുടെ കണക്കെടുക്കുകയായിരുന്നു. ഏറ്റവും ഉയര്‍ന്ന ശരാശരി ചെക്ക് റിപബ്ലിക്കിലാണ്. ഇവിടെ 29 ശതമാനം കോവിഡ് മരണങ്ങള്‍ക്കും വായുമലിനീകരണവുമായി ബന്ധമുണ്ട്. പോളണ്ടില്‍ 29 ശതമാനവും ചൈനയില്‍ 27 ശതമാനവും. കിഴക്കനേഷ്യയിലാണ് ഈ മരണ നിരക്ക് ഏറ്റവും കൂടുതല്‍. 27 ശതമാനം. മധ്യ യൂറോപ്പിലും അമേരിക്കയിലും 25 ശതമാനത്തോളം കോവിഡ് മരണങ്ങള്‍ക്കും വായുമലിനീകരണവുമായി ബന്ധമുണ്ട്. വായു മലിനീകരണം കുറവായിരുന്നെങ്കില്‍ ഈ മരണങ്ങള്‍ ഒഴിവാക്കാമായിരുന്നുവെന്നും പഠനം പറയുന്നു.
