കൊച്ചി- തന്നെ അച്ഛൻ ക്രൂരമായി മർദ്ദിക്കുന്നുവെന്നും താൻ കൊല്ലപ്പെട്ടേക്കുമെന്നും ഹാദിയ പറയുന്ന വീഡിയോ രാഹുൽ ഈശ്വർ പുറത്തുവിട്ടു. കൊച്ചിയിൽ നടത്തിയ വാർത്താ സമ്മേളനത്തിലാണ് രാഹുൽ ഈശ്വർ വീഡിയോ പുറത്തുവിട്ടത്. തന്നെ അച്ഛൻ പതിവായി തല്ലുകയും ചവിട്ടുകയും ചെയ്യുന്നുണ്ടെന്നും ഹാദിയ പറയുന്ന ദൃശ്യങ്ങളാണ് രാഹുൽ പുറത്തുവിട്ടത്. എന്നെ എത്രയും വേഗം ഇവിടെ നിന്ന് ഇറക്കണം. ഞാൻ നാളെയോ മറ്റന്നാളോ മരണപ്പെടും. എനിക്കുറപ്പാണ്. എന്റച്ഛന് ദേഷ്യം വരുന്നുണ്ട്. എനിക്കറിയാം. ഞാൻ പോകുന്ന വഴിയിൽ അച്ഛൻ എന്നെ തല്ലുന്നുണ്ട്. ചവിട്ടുന്നുണ്ട്''.എന്റെ തല, എന്റെ ശരീരം എവിടെയെങ്കിലും ഇടിക്കുകയോ !ഞാൻ മരണപ്പെടുകയും ചെയ്താൽ... എന്നാണ് ഹാദിയ വീഡിയോയിൽ പറയുന്നത്.
ഹാദിയയുടെ കൂടുതൽ വീഡിയോകൾ തന്റെ കൈവശമുണ്ടെന്നും അത് ഇപ്പോൾ പുറത്തുവിടില്ലെന്നും രാഹുൽ വ്യക്തമാക്കി. ഈ മാസം മുപ്പതിന് ഹാദിയയുടെ കേസ് സുപ്രീം കോടതി പരിഗണിക്കുന്നുണ്ട്. അതിന് മുന്നോടിയായാണ് ഇക്കാര്യം ലോകത്തെ അറിയിക്കുന്നത്. ഹാദിയയുടെ അച്ഛൻ അശോകന്റെയോ ഭർത്താവ് ഷെഫിൻ ജഹാന്റെയോ സംരക്ഷണയിലല്ലാതെ മൂന്നാമത് ഒരിടത്തേക്ക് ഹാദിയയെ മാറ്റണമെന്നും രാഹുൽ ഈശ്വർ ആവശ്യപ്പെട്ടു.
