ജർമൻ ആഡംബര വാഹന നിർമാതാക്കളായ ഓഡിയുടെ എസ്.യു.വി മോഡൽ ക്യു-2 ഇന്ത്യയിൽ അവതരിപ്പിച്ചു. അഞ്ച് വേരിയന്റുകളിലെത്തുന്ന എസ്.യു.വിക്ക് 34.99 ലക്ഷം രൂപ മുതൽ 48.89 ലക്ഷം രൂപ വരെയാണ് എക്‌സ് ഷോറൂം വില. ആഗോള തലത്തിൽ അവതരിപ്പിച്ചിട്ടുള്ള ക്യു-2 ന്റെ പ്രീ ഫെയ്‌സ്‌ലിഫ്റ്റ് പതിപ്പാണ് ഇന്ത്യയിൽ എത്തിയിരിക്കുന്നത്. സ്റ്റാന്റേർഡ്, പ്രീമിയം, പ്രീമിയം പ്ലസ്-1, പ്രീമിയം പ്ലസ്-2, ടെക്‌നോളജി എന്നീ അഞ്ച് വേരിയന്റുകളിലാണ് ക്യു-2 വിപണിയിൽ എത്തിയിട്ടുള്ളത്. ഓഡിയുടെ മറ്റൊരു എസ്.യു.വി മോഡലായ ക്യു-3യുടെ തൊട്ടു താഴെയാണ് ഈ വാഹനത്തിന്റെ സ്ഥാനം. ഇന്ത്യൻ നിരത്തിൽ മെഴ്‌സിഡസ് ബെൻസ് ജി.എൽ.എ, ബി.എം.ഡബ്ല്യു എക്‌സ്-1 എന്നീ വാഹനങ്ങളുമായായിരിക്കും മത്സരം. പൂർണമായും വിദേശത്ത് നിർമിച്ചായിരിക്കും ക്യു-2 ഇന്ത്യയിൽ എത്തിക്കുക. സർക്കാരിന്റെ പ്രത്യേക അനുമതി ഇല്ലാതെ തന്നെ 2500 യൂണിറ്റ് വരെ വാഹനങ്ങൾ നിർമാതാക്കൾക്ക് ഇന്ത്യയിൽ ഇറക്കുമതി ചെയ്യാൻ സാധിക്കും. ഈ സാധ്യത ഉപയോഗിച്ചാണ് ക്യു-2 എസ്.യു.വി പൂർണമായും ഇറക്കുമതി ചെയ്ത് ഇന്ത്യയിൽ എത്തിക്കാൻ ഓഡി തീരുമാനിച്ചിരിക്കുന്നത്. യുവ ഉപയോക്താക്കളെ ലക്ഷ്യമിട്ടാണ് സ്‌പോർട്ടി ഭാവവും മികച്ച പ്രകടനവും ഉറപ്പ് നൽകുന്ന പുതിയ മോഡൽ അവതരിപ്പിച്ചിട്ടുള്ളത്. 6.5 സെക്കന്റിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ ഇതിനാവുമെന്നാണ് കമ്പനി അവകാശപ്പെടുന്നത്.
