തിരുവനന്തപുരം- സ്ത്രീകളെ അധിക്ഷേപിച്ച് കൊണ്ടുള്ള വിഡിയോ ചിത്രീകരിച്ച് സാമൂഹ്യമാധ്യമങ്ങളില് പ്രചരിപ്പിച്ച വിജയ് പി നായരെ കൈയേറ്റം ചെയ്ത സംഭവത്തില് ഭാഗ്യലക്ഷ്മി, ആക്ടിവിസ്റ്റുകളായ ദിയ സന, ശ്രീലക്ഷ്മി അറയ്ക്കല് എന്നിവരുടെ മുന്കൂര് ജാമ്യാപേക്ഷ തിരുവനന്തപുരം അഡീഷണല് സെഷന്സ് കോടതി തള്ളി.
ഭാഗ്യലക്ഷമിക്കും സുഹൃത്തുക്കള്ക്കും കോടതിയുടെ രൂക്ഷ വിമര്ശവുമുണ്ടായി. കായികബലം കൊണ്ട് നിയമത്തെ നേരിടാന് കഴിയില്ല. ഒട്ടും സംസ്കാരമില്ലാത്ത പ്രവൃത്തിയാണ് പ്രതികള് ചെയ്തത്. സമാധാനവും നിയമവും കാത്തുസൂക്ഷിക്കേണ്ട ബാധ്യത കോടതിക്കുണ്ട്. ഈ ബാധ്യതയില് നിന്ന് കോടതിക്ക് പിന്മാറാനാവില്ലെന്നും കോടതി ഉത്തരവില് പറഞ്ഞു മുന്കൂര് ജാമ്യം നല്കുന്നതിനെ എതിര്ത്ത സര്ക്കാര് വാദം അംഗീകരിച്ചാണ് കോടതിയുടെ നടപടി. കൈയേറ്റം ചെയ്യല്, മോഷണം തുടങ്ങി അഞ്ച് വര്ഷം വരെ തടവ് ശിക്ഷ ലഭിക്കാവുന്ന കുറ്റങ്ങളാണ് ഇവര്ക്കെതിരെയുള്ളത്.
വിജയ് പി നായര് നല്കിയ പരാതിയിലാണ് തമ്പാനൂര് പോലീസ് ഭാഗ്യലക്ഷ്മിക്കും സുഹൃത്തുക്കള്ക്കുമെതിരെ ജാമ്യമില്ലാ വകുപ്പ് ചുമത്തി കേസെടുത്തത്. അതിക്രമിച്ചു കടക്കല്, ഭീഷണി, കൈയ്യേറ്റം ചെയ്യല്, മോഷണം എന്നീ വകുപ്പുകള് ചേര്ത്താണ് കേസ്. നേരത്തെ ഭാഗ്യലക്ഷ്മിയും സംഘവും സമര്പ്പിച്ച ജാമ്യാപേക്ഷയെ കേരള സര്ക്കാര് എതിര്ത്തിരുന്നു. നിയമം കയ്യിലെടുക്കാനുള്ള തെറ്റായ സന്ദേശം നല്കുമെന്ന് ചൂണ്ടിക്കാട്ടിയാണ് സര്ക്കാര് എതിര്പ്പ് അറിയിച്ചത്. സ്ത്രീകളെ അധിക്ഷേപിക്കുന്ന തരത്തില് അശ്ലീല പദപ്രയോഗങ്ങള് നടത്തിക്കൊണ്ടുള്ള യൂട്യൂബ് ചാനല് നടത്തിയ വിജയ് പി നായരെ ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മി, സാമൂഹ്യപ്രവര്ത്തകരായ ദിയ സന, ശ്രീലക്ഷ്മി അറക്കല് എന്നിവര് ചേര്ന്ന് മര്ദ്ദിക്കുകയും ഇയാളുടെ മുഖത്ത് കരിമഷി ഒഴിച്ച് പ്രതിഷേധിക്കുകയും ചെയ്തിരുന്നു. ചാനലിനെതിരെ പോലീസിനെ സമീപിക്കുകയും സംസ്ഥാന വനിതാ കമ്മീഷന്, സൈബര് സെല്, വനിതാ ശിശുക്ഷേമവകുപ്പ്, ജെന്ഡര് അഡൈ്വസര് എന്നിവര്ക്ക് പരാതി നല്കുകയും ചെയ്തിട്ടും നടപടിയൊന്നും എടുക്കാത്തതിനെ തുടര്ന്നായിരുന്നു ഇവര് നേരിട്ട് പ്രതിഷേധവുമായെത്തിയത്
