ടൊറന്റോ-വിമാന യാത്രയ്ക്കിടെ ഹൃദ്രോഗ ലക്ഷണങ്ങള്‍ കാണിച്ച 65 കാരിയെ രക്ഷിച്ച് മലയാളി നഴ്‌സ് ദമ്പതികള്‍. വന്ദേ ഭാരത് ദൗത്യത്തിന്റെ ഭാഗമായി ടൊറന്റോയില്‍ നിന്നും ദല്‍ഹിയിലേക്ക് പുറപ്പെട്ട വിമാനത്തിലെ യാത്രക്കാരിക്ക് ആണ് ദേഹാസ്വാസ്ഥ്യം അനുഭവപ്പെട്ടത്. കഴിഞ്ഞ ദിവസം രാത്രി വിമാനം പറന്നുയര്‍ന്ന് നാലുമണിക്കൂര്‍ കഴിഞ്ഞപ്പോഴാണ് സംഭവം. വിവരമറിഞ്ഞ് ഫ്‌ളൈറ്റ് ക്രൂ യാത്രക്കാരില്‍ ഡോക്ടര്‍മാരോ നഴ്‌സ്മാരോ ഉണ്ടോയെങ്കില്‍ വന്ന് സഹായിക്കണമെന്ന് അനൗണ്‍സ് ചെയ്തു. ഈ സമയത്തു കോവിഡ് ഭീതി പോലും മറന്ന് കാനഡയില്‍ നഴ്‌സും മലയാളിയുമായ ഷിന്റു ജോസ് വയോധികയ്ക്ക് സഹായവുമായെത്തുകായിരുന്നു. ഒപ്പം ഷിന്റുവിന്റെ ഭര്‍ത്താവും നഴ്‌സുമായ ഷിന്റോ സ്റ്റീഫനും സഹായിക്കാനെത്തി. ഷിന്റു നടത്തിയ പരിചരണത്തിനൊടുവില്‍ വയോധിക വേഗത്തില്‍ ആരോഗ്യം വീണ്ടെടുത്തു. ഇതോടെ വിമാനം അടിയന്തിരമായി നിലത്തിറക്കാനുള്ള തീരുമാനം ഒഴിവാക്കി പൈലറ്റ് യാത്ര തുടരുകയായിരുന്നു.
തൊടുപുഴ ചുങ്കം സ്വദേശിനി ഷിന്റുവും ഭര്‍ത്താവ് കാസര്‍കോട് ചുള്ളിക്കര സ്വദേശി ഷിന്റോ സ്റ്റീഫനുമാണ് സഹയാത്രക്കാരുടെയും ക്രൂവിന്റെയും അഭിനന്ദനമേറ്റുവാങ്ങിയത്. ഹൃദയാഘാതത്തിന്റെ നേരിയ ലക്ഷണമാണ് വയോധികയില്‍ കണ്ടത്. നാട്ടിലുള്ള മക്കളെ കാനഡയിലേക്ക് കൊണ്ടു പോകാന്‍ വേണ്ടിയാണ് ഇരുവരും നാട്ടിലേക്ക് വന്നത്. നാട്ടിലെത്തിയ ഇവര്‍ ക്വറന്റീനിലാണ്‌
