ന്യൂദല്‍ഹി- ജനപ്രിയ മെസേജിംഗ് ആപ്ലിക്കേഷനായ വാട്‌സ്ആപില്‍ ചാറ്റുകള്‍ മറച്ചുവെക്കാവുന്ന സൗകര്യം ഉടന്‍ ഉള്‍പ്പെടുത്തുമെന്ന് റിപ്പോര്‍ട്ട്. ഏതാണ്ട് ഒരു വര്‍ഷം മുമ്പ് വാട്‌സ്ആപിന്റെ ബീറ്റ പതിപ്പില്‍ കണ്ടെത്തിയ വെക്കേഷന്‍ മോഡാണ് ഇപ്പോള്‍ നടപ്പിലാക്കാനൊരുങ്ങുന്നത്.
ബീറ്റ പതിപ്പില്‍ പരീക്ഷിക്കുന്ന സവിശേഷതകള്‍ ട്രാക്കുചെയ്യുന്ന വെബ്‌സൈറ്റായ വാബീറ്റാഇന്‍ഫോയാണ് ഇക്കാര്യം റിപ്പോര്‍ട്ട് ചെയ്തത്. വെക്കേഷന്‍ മോഡ് സവിശേഷത ആദ്യമായി കണ്ടെത്തിയത് വാബീറ്റാഇന്‍ഫോ തന്നെയാണെങ്കിലും കമ്പനി പിന്നീട് ഇത് ഉപേക്ഷിച്ച നിലയിലായിരുന്നു.
വെക്കേഷന്‍ മോഡ് വീണ്ടും വരികയാണെന്നും ആന്‍ഡ്രോയിഡ് ഉപയോക്താക്കള്‍ക്കായി ഇത് ഉടന്‍ തന്നെപുറത്തിറക്കുമെന്നും പുതിയ റിപ്പോര്‍ട്ടില്‍ അവകാശപ്പെടുന്നു. വാട്‌സ്ആപിലെ ആര്‍ക്കൈവുചെയ്ത ചാറ്റുകളില്‍ ഉപയോക്താവിന് കൂടുതല്‍ നിയന്ത്രണം നല്‍കുന്നതും പുതിയ സന്ദേശം ലഭിച്ചാലും ആര്‍ക്കൈവുചെയ്ത ചാറ്റുകളില്‍ അവ മറച്ചുവെക്കാനും അനുവദിക്കുന്ന സൗകര്യമാണ് വെക്കേഷന്‍ മോഡ്.
ആര്‍ക്കൈവുചെയ്ത ചാറ്റുകള്‍ കണ്ടെത്താന്‍ കഴിയുന്ന തരത്തിലാണ് ഇപ്പോള്‍ നിലനിര്‍ത്തുന്നത്. വെക്കേഷന്‍ മോഡ് എന്ന പുതിയ സവിശേഷത ഉപയോഗിച്ച് ഉപയോക്താക്കള്‍ക്ക് ആര്‍ക്കൈവുചെയ്ത ചാറ്റുകള്‍ ചാറ്റുകള്‍ക്ക് മുകളില്‍ സൂക്ഷിക്കാനോ ഉപയോഗത്തിലില്ലാത്തപ്പോള്‍ മറച്ചുവെക്കാനോ കഴിയും.
പുതിയ സവിശേഷത നടപ്പിലാകുമ്പോള്‍ ആര്‍ക്കൈവുചെയ്ത ചാറ്റുകള്‍ ചാറ്റ് ലിസ്റ്റിന്റെ മുകളിലേക്ക് നീക്കും. വെക്കേഷന്‍ മോഡ് സവിശേഷത നടപ്പിലാക്കിയ ശേഷം, ആര്‍ക്കൈവുചെയ്ത വിഭാഗത്തില്‍ അറിയിപ്പുകള്‍ എന്ന പുതിയ ബട്ടണും കാണിക്കും. പുതിയ അറിയിപ്പുകള്‍ ബട്ടണ്‍ ഉപയോഗിച്ച് ഉപയോക്താവിന് ആര്‍ക്കൈവുചെയ്ത ചാറ്റുകളുടെ സ്വഭാവം തെരഞ്ഞെടുക്കാനാകും.
പുതിയ സന്ദേശങ്ങളെ കുറിച്ച് അറിയിപ്പ് നല്‍കുന്ന സൗകര്യം ഉപയോക്താവിന് തെരഞ്ഞെടുക്കാം. സജീവമാകുമ്പോള്‍, ആര്‍ക്കൈവുചെയ്ത ചാറ്റുകള്‍ നിലവിലെ സ്ഥിരം പതിപ്പ് പോലെ പ്രവര്‍ത്തിക്കുമെങ്കിലും ഉപയോക്താവിന് ഇത് മാറ്റാന്‍ കഴിയും. പുതിയ സന്ദേശങ്ങള്‍ വന്നതിനുശേഷവും ആര്‍ക്കൈവുചെയ്ത സന്ദേശങ്ങള്‍ ആര്‍ക്കൈവുകളില്‍ തന്നെ നിലനിര്‍ത്താം.
ആറു മാസം മുതല്‍ ഇന്‍ ആക്ടീവായ ചാറ്റുകള്‍ സ്വമേധയാ ആര്‍ക്കൈവിലേക്ക് പോകുന്നതാണ് രണ്ടാമത്തെ ഒപ്ഷന്‍.
