റിയാദ് - ബലിപെരുന്നാൾ അവധി ദിവസങ്ങളിൽ ജവാസാത്ത് ഡയറക്ടറേറ്റ് ഓഫീസുകൾ പ്രവർത്തിക്കുമെന്ന് സൗദി ജവാസാത്ത് വ്യക്തമാക്കി. ഓൺലൈൻ സേവന പോർട്ടലായ അബ്ശിർ വഴി പൂർത്തിയാക്കാൻ കഴിയാത്ത അടിയന്തിര കേസുകൾ ജവാസാത്ത് പൂർത്തിയാക്കും. ഇത്തവണ സർക്കാർ ഉദ്യോഗസ്ഥർക്ക് പതിനാറു ദിവസം ബലിപെരുന്നാൾ അവധി ലഭിക്കും. ദുൽഹജ് രണ്ടിന് (ഇന്ന്) ഡ്യൂട്ടി അവസാനിച്ച ശേഷം സർക്കാർ ജീവനക്കാർക്ക് ബലിപെരുന്നാൾ അവധി ആരംഭിക്കും. ദുൽഹജ് 19 ന് ആണ് അവധി കഴിഞ്ഞ് ഡ്യൂട്ടി പുനരാരംഭിക്കുക. സ്വകാര്യ മേഖലാ ജീവനക്കാർക്ക് ദുൽഹജ് ഒമ്പതു മുതൽ പന്ത്രണ്ടു വരെ നാലു ദിവസമാണ് ബലിപെരുന്നാൾ അവധി.
ജവാസാത്തിൽ നിന്നുള്ള ഏതെങ്കിലും സേവനം ഓൺലൈൻ വഴി പൂർത്തിയാക്കാൻ പ്രതിബന്ധമുള്ളതായി സന്ദേശം പ്രത്യക്ഷപ്പെടുന്ന പക്ഷം അബ്ശിർ പോർട്ടലിലെ സന്ദേശങ്ങൾ, അപേക്ഷകൾ എന്ന സേവനം വഴി അത്തരം നടപടിക്രമങ്ങൾ പൂർത്തിയാക്കാവുന്നതാണെന്ന് കിഴക്കൻ പ്രവിശ്യ ജവാസാത്ത് വക്താവ് കേണൽ മുഅല്ല അൽഉതൈബി പറഞ്ഞു. അബ്ശിർ പ്ലാറ്റ്‌ഫോമിൽ പ്രവേശിച്ച് ഖിദ്മാതീ ഐക്കൺ തെരഞ്ഞെടുത്ത് ജനറൽ സർവീസ് സെലക്ട് ചെയ്താണ് സന്ദേശങ്ങൾ, അപേക്ഷകൾ എന്ന ലിങ്കിൽ എത്തേണ്ടത്.
ഈ സേവനത്തിലൂടെ ജവാസാത്തിൽ നിന്നുള്ള സേവനത്തിനുള്ള അപേക്ഷ ബന്ധപ്പെട്ട രേഖകൾ സഹിതം സമർപ്പിക്കണം. ഇതോടെ അപേക്ഷയിൽ ജവാസാത്തിൽ നിന്ന് നടപടിക്രമം പൂർത്തിയാക്കി നൽകുകയും മറുപടി ലഭിക്കുകയും ചെയ്യും. ഓൺലൈൻ വഴി നേരിട്ട് പൂർത്തിയാക്കാൻ സാധിക്കാത്ത നടപടിക്രമങ്ങൾ ഇതേ പോലെ ബന്ധപ്പെട്ട രേഖകൾ സഹിതം പ്രത്യേക അപേക്ഷ സമർപ്പിച്ച് പൂർത്തിയാക്കാം. ഇതിന് ജവാസാത്ത് ഡയറക്ടറേറ്റിനെ നേരിട്ട് സമീപിക്കേണ്ട ആവശ്യമില്ല.
